Халықаралық балаларды қорғау күніне орай «AMANAT» партиясының өкілдері бірқатар қайырымдылық акциясын өткізді.
Партияның Талғар аудандық бөлімшесінің бастамасымен Зухра Қасайынова басқаратын «Ұлттық құндылықтар» мүгедек аналар мен балаларды қолдау орталығы Белбұлақ ауылында орналасқан «Қуаныш» мейрамханасында үлкен шара ұйымдастырды. Оған «AMANAT» партиясы аудандық филиалы төрағасының орынбасары Серік Дүмшібаев, аудандық мәслихат депутаты Бағжан Құдабаев, жұмыспен қамту және әлеуметтік бағдарламалар орталығының жетекшісі Гүлжан Айтқожақова, Кендала ауылдық бастауыш партия ұйымының төрағасы Айдын Сүлеймен, ерекше балалардың ата-аналары қатысты.
Серік Дүмшібаев қамқорлыққа мұқтаж балаларды айтулы мерекемен құттықтап, 50 балаға ой-өрісін дамытатын арнайы әзірленген «Ақылды балақай» білім буклеттерін табыс етті. Оның айтуынша, бұл бастама балалардың зияткерлік қабілеттерін арттыруға бағытталған. Мерекелік шарада балалар концерттік бағдарлама және өз қолдарымен дайындаған шығармашылықтарын ұсынды. Ата-аналар ұйымдастырушыларға шынайы алғыс білдіріп, осындай ізгі ниет пен мейірімділік оларға зор қуаныш сыйлағанын жеткізді.
Осы күні Кендала ауылдық бастауыш партия ұйымының төрағасы Айдын Сүлеймен бастаған партия өкілдері де мүмкіндігі шектеулі және тұрмысы төмен отбасылардан шыққан балаларға арналған қайырымдылық акциясын ұйымдастырды. Шара барысында балаларға қажетті әртүрлі киім-кешек табысталып, оларға естен кетпес қуаныш пен бақытты сәт сыйлады.
Қайнар ауылында да «AMANAT» партиясы бастауыш партия ұйымының төрағасы Ерлік Тілеубай пен аудандық мәслихат депутаты Мақсұт Омарбаев балаларға ұмытылмас қуаныш сыйлады. Мереке аясында 500 балаға тәтті балмұздақ ұсынылды. Бұл шараға демеушілер де үлкен қолдау көрсетті.
Ең бастысы, бір күнде ауданның бірнеше ауылында өткен қайырымдылық шарасы ауыл тұрғындарының бірлігі мен бала бақыты үшін ештеңені аямайтын жомарт жандардың шынайы қамқорлығын көрсетті.
Құтмағамбет ҚОНЫСБАЙ
Талғар ауданы
