Қазақстан Республикасы Ұлттық қауіпсіздік комитеті Шекара қызметінің Алматы облысы бойынша департаменті бұқаралық ақпарат құралдары қызметкерлеріне құрмет көрсетті. Алматыдағы Ұлттық кітапханада өткен алқалы басқосуды ТИжКЖБ бастығының міНдетін атқарушы, подполковник Хандияр Әділ ашып, жүргізіп отырды.
Журналистерге шекара тақырыбын тұрақты түрде көтеріп, қоғам назарын осы маңызды салаға аударып жүргендері үшін алғыс білдірген Хандияр Әділ сөз кезегін Ұлттық қауіпсіздік комитеті Шекара қызметі Алматы облысы бойынша департаментінің бастығы, полковник Әлібек Каюповқа берді.
– Сіздерді кәсіби мерекелеріңіз – бұқаралық ақпарат құралдары қызметкерлері күнімен шын жүректен құттықтаймын! Бүгінгі брифинг – сіздермен кездесіп, атқарылып жатқан жұмыстармен бөлісіп, шекара қызметі мен БАҚ арасындағы ынтымақтастықты одан әрі нығайту мақсатында ұйымдастырылып отыр, – деді Әлібек Амангелдіұлы сөзінің басында. – Біздің департамент еліміздің шығыстағы шекарасын қорғау, мемлекеттік шекара режимін қамтамасыз ету және шекаралық қауіпсіздікті сақтау міндетін атқарады. Бұл – жауапкершілігі жоғары, үздіксіз және жүйелі қызмет екені белгілі.
Бүгінгі шекара қызметі заманауи техникалық жабдықтармен қамтамасыз етілгенін тілге тиек еткен Әлібек Амангелдіұлы журналистермен бірлесе жүргізген жұмыстарға тоқталып, жас ұрпаққа отансүйгіштік және патриоттық тәрбие беруде бұқаралық ақпарат құралдарының атқарар қызметіне жоғары баға берді.
Осыдан кейін ашық пікір білдіру үшін кезек журналистерге берілді. Жиында «Бірінші арна» телеарнасының продюсері Полина Шманская, «Казахстанская правда» газетінің тілшісі Николай Жоров, «Ұйғыр авази» газетінің бас редакторы Ершат Асматов, «Евразия» бірінші арнасының тілшісі Ұлан Тәліпбай сөз алып, шекара қызметі мен жауынгерлердің еңбегін насихаттау барысында өздері атқарып жүрген жұмыстар жайлы әңгімеледі.
Осыдан кейін өкен ғасырдың 20-шы жылдарынан бастау алатын Қазақстан Республикасы Ұлттық қауіпсіздік комитеті Шекара қызметі Алматы облысы бойынша департаментінің даңқты жауынгерлік жолы мен тәуелсіздік кезеңіндегі ерлік істері баяндалатын «Біз – Отанның берік қалқаны» атты кітаптың тұсауы кесіліп, алғашқы даналары Ұлттық кітапхананың қорына табыс етілді.
Бұл іс-шараға шекарашылар құралақан келмеген екен. Шекара қызметі жайлы мақалалар мен түсірілімдер әзірлеп, жауынгерлердің өмірін насихаттап жүрген журналистерге бағалы сыйлықтар мен департамент басшысының Құрмет грамотасы табыс етілді.
Қуат ҚАЙРАНБАЕВ
