Бұқаралық ақпарат құралдары қызметкерлерінің төл мерекесіне орай аудандық әкімшіліктің кіші залында шара өтті. Мерекелік шараға аудандағы журналистер қауымы мен сала ардагерлері, облыстық «Райымбек» газеті мен аудандық «Қарқара» газеті редакциясының қызметкерлері қатысты.
Журналистер күніне орай ұйымдастырылған шара еркін форматта өтті. Дөңгелек үстел үстіндегі мерекелік кездесуді аудан әкімі Нұрбақыт Теңізбаев құттықтау сөз сөйлеп ашып, журналистер қауымының қазіргі қоғамдағы орны ерекше екенін атап өтті. Халықтың тіршілігінен, әлеуметтік әл-ауқаты мен руханияты және қоғам тынысынан хабар таратып, халық пен билік арасында алтын көпірге айналған қалам иелерімен кездесуде аудан басшысы:
– Журналист болу – халыққа қызмет ету. Сондықтан да журналистика саласына артылар міндет пен жүк жеңіл емес. Бүгінде ақпарат айдынында еңбек етіп жүрген тілшілер қауымы заман көшінен қалмай, жаңа медианы меңгеріп, елдікті сақтау, азаттықты баянды ету жолында абыройлы қызмет атқарып жүр. Мемлекетіміз де баспасөз бен тележурналистика, ақпараттық сайттар заман талабына сай түрленіп, қоғамға қажетті маңызды ақпараттарды уақытылы таратып келеді. Елді игі іске жұмылдырып, берекені арттырып, татулықты нығайтуда билік пен халық арасында алтын көпір болып жүрген бұқаралық ақпарат құралдары өкілдерінің рөлі қашан да жоғары. Алаштың ардақты азаматы, ұлт ұстазы Ахмет Байтұрсынұлы «Газет -халықтың көзі, құлағы һәм тілі» демекші, осы салада қызмет етіп жүрген жергілікті ақпарат құралдарының еңбектері өлшеусіз. Сіздер аудандағы жаңалықтарды салмақты сөз, салиқалы пікірлеріңізбен жеткізіп, халықтың жүрегіне жол тауып келесіздер. Өңір тынысымен халықты дер кезінде құлағдар ету бағытындағы жұмыстарыңыз еселеніп, табысты да жемісті еңбектеріңіз еленіп, алдағы мақсаттарға жету жолындағы жаңа биіктер мен шыңдардан көріне беріңіздер. Сіздерге ақпарат айдынындағы қажырлы қызметтеріңіз үшін үлкен алғысымды білдіре отырып, баршаңызға мықты денсаулық, отбасыларыңызға амандық, шығармашылық табыс пен шабыт тілеймін. Мереке құтты болсын!- дей келе, әрдайым жағымды жаңалықтармен қатар, елдің мұң-мұқтажын көтеріп жүрген журналистерге ризашылығын білдірді.
Сонымен қатар, аудан әкімі қоғамдық ойды қалыптастыруда жағымды жаңалықтардың жаршысы болуға өзіндік үлесін қосып жүрген бірқатар сала қызметкерлерін алғыс хатпен марапаттап, арнайы сыйлықтар табыстады.
Басқосуға қатысқан ұзақ жыл осы салада қызмет еткен қаламгерлер Марат Тақабаев, Келеке Құсайынов, Иемберді Тастанов, «Райымбек» газетінің бас редакторы Шыңғыс Тұрсынов, аудандық «Қарқара» газетінің бас редакторы Лаура Мұхаметқали, Сырым Шыңғысұлы, Мира Мұраталиева, Жақсылық Нүсіпханұлы, Дәурен Ермекбай, Мақпал Шадан әріптестерін құттықтап, бірқатар ұсыныс-тілектерін жеткізді.
– Журналистер қауымының дайындаған әрбір материалдарында елдің мұңы мен мұқтажы, ойы мен пікірі, талабы мен тілегі, қоғам дамуының тынысы айқын көрініс тауып отырады. Газет- облыстың, республиканың айнасы. Газеттен қол үзбеймін, 6-7 газет алып оқимын. Газет – төртінші билік екенін дәлелдеп келеді. «Қарқара» газеті көптеген мәселелерді көтерді. Кезінде Жолшы Бікебаев басқарған «Коммунизм нұры» алтын ғасыр дәуірі болды. Аудан басшысының газет қызметкерлерін қабылдап отырғанына алғысымды білдіремін! – деді ардагер журналист Иемберді Тастанов.
– 15 жыл «Қарқара» газетінде істедім, журналистер мемлекеттің саяси өмірінде жүр. Халық пен билік арасында алтын көпір іспеттес болған сала мамандары барлық құрметке лайық. Сондықтан да журналистика саласына артылар міндет пен жүк жеңіл емес, – деді «Райымбек» газетінің бас редакторы Шыңғыс Тұрсынов.
Ардагер журналист Марат Тақабаев көптен бері ауданда БАҚ өкілдерінің кәсіби мерекесін атап өту ұмытып кеткенін айтып, әкімге оны қайта жаңғыртқаны үшін алғыс білдірді.
Жиын соңында марапатталған тілшілер қауымы аудан әкімі Нұрбақыт Молдахметұлымен бірге естелік суретке түсті.
Дәурен ӘБУТӘЛІПОВ
Кеген ауданы
