Облыс әкімі Марат Сұлтанғазиев «Қонаев академиялық қалашығын» салуға жауапты «Qonayev Academic Campus» Fund» коммерциялық емес ұйымы өкілдерімен және құрылысқа қаржы салуға ниет білдірген шетелдік инвесторлармен кездесіп, жобаны жүзеге асырудың жай-жапсарын саралады.
Ең алдымен аймақ басшысы шетелдік инвесторға өңір экономикасында оң динамика бар екенін айтып, стратегиялық даму жоспарын тілге тиек етті.
– «Қонаев академиялық қалашығын» салу – Мемлекет басшысы Қасым-Жомарт Тоқаевтың тапсырмасы. Бүгінде қалашыққа инфрақұрылым жүргізіп, халықаралық ұйымдар мен инвестициялық қорлардан қаржы тарту көзделген. Сол инвестициялар негізінде 2024-2027 жылдар аралығында еліміздің төрт университетін осы жерге көшіру жоспарланған. Содан кейін шетелдік төрт университет тағы ашылады. Артынша ғылыми-зерттеу орталықтары мен зертханалар, жатақханалар мен қонақ-үйлер салу жоспары бар. Қалашыққа 100 гектарға жуық жер телімі беріліп, Қонаев қаласының Бас жоспарына енгізілген. Бүгінгі таңда Қазақстанда 700 мыңға жуық студент оқиды, ал 2030 жылға қарай олардың саны бір миллионнан асады. Академиялық қалашық жобасын іске асыру өңір үшін ғана емес, бүкіл елдің дамуы үшін маңызға ие, – деді облыс әкімі.
Кездесуде жобаны жүзеге асыруға ынта білдіріп отырған қытайлық «Qingdao Shangheshi Oil Energy Co» компаниясының негізін қалаушы Чжан Цзяньцзюнь облыс басшысынан әлемдік талапқа сай академиялық қалашық салу үшін белгіленген жер көлемін кеңейтуді және аталған аумақты толық инфрақұрылымдық жүйемен қамтамасыз етуді өтінді. Ал аймақ басшысы инвестор жобасын жан-жақты зерделейтінін айтты.
– Бүгінгі кездесу жоспарланған міндеттерді тиімді жүзеге асыруға мүмкіндік беретініне және бірлескен жұмысты жалғастыруға негіз болатынына сенімдімін. Қорытындылай келе, біз өңірдің экономикалық дамуына және өзара тиімді ынтымақтастықты нығайтуға бағытталған барлық бастамаларды қолдауға әрқашан дайынбыз, – деді Марат Елеусізұлы.
Атап айтсақ, өткен жылы облысы әкімдігі, ҚР Ғылым және жоғары білім министрлігі, «Qonayev Academic Campus» Fund» комерциялық емес ұйымы арасында «Қонаев академиялық қалашығы» құрылысына халықаралық ұйымдар мен инвестициялық қорлардан қаржы тарту мақсатында өзара ынтымақтастық туралы үшжақты меморандумға қол қойылған. Бүгінде ол келісім негізінде аталған жоба жүзеге аса бастады.
Ерзат АСЫЛ
