Облыс орталығында Полиция күні аталып өтіп, қызметтік міндетін адал атқарып жүрген үздік тәртіп сақшылары марапатталды. Іс-шарада ішкі істер органдары қызметкерлері мен ардагерлеріне құрмет көрсетілді.
Салтанатты жиында облыс әкімі Марат Сұлтанғазиев пен облыстық полиция департаментінің бастығы, полиция полковнигі Мейрам Әбікеев сөз сөйледі. Аймақ басшысы полиция қызметкерлері мен сала ардагерлерін кәсіби мерекемен құттықтап, қоғамдық тәртіп пен қауіпсіздікті қамтамасыз ету жолындағы маңызды әрі күрделі міндеттерді абыроймен атқарып келе жатқанын атап өтті.
– Облыстық полиция департаменті тарихында қызметтік борышын адал атқарып, ерлік пен жанқиярлықтың айшықты үлгісін көрсеткен батырлар аз емес. Олар – қоғамдық қауіпсіздікті қамтамасыз ету жолында өмірін қауіпке тігіп, Отан алдындағы антына берік болған нағыз ерлер. Тәуелсіздік алған жылдан бері қызметтік борышын өтеу барысында 40 полиция қызметкері ерлікпен қаза тапты. Олар – бейбіт елдің тыныштығы үшін өмірін құрбан еткен нағыз қаһармандар. Біз ерлікпен қаза тапқан қызметкерлердің есімін мәңгі жадымызда сақтап, қайсарлық пен жанқиярлыққа толы ерліктерін кейінгі буынға үлгі етуіміз қажет. Бұл – әрбіріміздің қасиетті борышымыз. Болашақта да осы қасиетті міндетті абыроймен атқара беретіндеріңізге сенімдімін. Мамандыққа деген адалдықтарыңыз, тәртіп пен әділдікке қызмет ету жолындағы еңбектеріңіз үшін зор алғысымды білдіремін! – деді Марат Елеусізұлы.
Бүгінде облыс әкімдігі тарапынан полиция департаментінің материалдық-техникалық базасын нығайтуға ерекше көңіл бөлінуде. Аталған мерекеге орай облыс басшысы полиция департаментіне қосымша 40 жаңа қызметтік автокөлік табыстап, қоғам тыныштығын күзеткен тәртіп сақшыларына қашанда қолдау көрсетілетінін жеткізді. Шара аясында қызметтік міндеттерін адал атқарғаны, кәсібилігі мен антқа адалдығы үшін үздік қызметкерлерге мемлекеттік және ведомстволық наградалар – медаль, төсбелгі, Құрмет грамотасы мен Алғыс хат табысталды.
Ерзат АСЫЛ
