Жұмысшы мамандықтары жылына орай Есік археологиялық-өлкетану музейі тағы бір құнды жәдігермен толықты. Социалистік Еңбек Ерлері – Қасым мен Насиха Дүйсекеевтердің немересі Елжан Қасымов ата-әжесінің жеке заттары мен сирек фотосуреттерін музей қорына табыстады.
Қасым мен Насиха Дүйсекеевтер – соғыстан кейінгі қиын кезеңде ел еңсесін көтеруге атсалысқан еңбек майталмандары. Екінші дүниежүзілік соғыстан еліне аман-есен оралған Қасым ата зайыбы Насихамен Қырбалтабайда мал шаруашылығын өркендетуге өз үлестерін қосты. Жылқы өсіруге белсене кіріскен ерлі-зайыптылар табандылығы мен маңдай терінің арқасында абыройға кенелді. 1947 жылғы социалистік жарыс қорытындысы бойынша Мәскеуде өткен Бүкілодақтық ауыл шаруашылығы көрмесіне қатысады. Ерен еңбектері ескеріліп, бір үйден екі адамға Социалистік Еңбек Ері атағы берілуі — сирек кездесетін оқиға.
Бұл – тек отбасының ғана емес, тұтас өңір тарихының мақтанышы. Музей қызметкерлері Елжан Қасымовқа зор алғыс айтып, табысталған жәдігерлерді ұрпаққа үлгі ретінде ұсынатынын жеткізді.
Нарима Тойжанова,
Есік археологиялық-өлкетану музейінің меңгерушісі
Еңбекшіқазақ ауданы
