Талғардың көрікті жерінде 1968 жылдан бері жұмыс істеп келе жатқан облыстық жас натуралистер стансасы аумағында «Бақытты балалық шақ» жазғы лагері ашылды. Аталған шараға Іле-Алатау ұлттық мемлекеттік табиғи паркінің Талғар филиалы және қалалық әкімдік өкілдерінің қатысуымен аудандық білім бөлімі бастамашы болды.
Түрлі-түсті шарлармен безендірілген жазғы алаңда қонақтарды аниматорлар, сондай-ақ концерттік бағдарламаға қатысуға дайын ертегі кейіпкерлері қарсы алды. Жиналған көпшілікті құттықтаған аудандық білім бөлімінің басшысы Айнагүл Үшкемпірова аталған шараның маңызын атап өтті.
– Қымбатты балалар, бүгін сіздер үшін айтулы күн! Аудандық білім бөлімінің және қала мен аудан мектептері әкімшілігінің күшімен біз денсаулыққа пайдалы демалыс өткізу және дүниетанымымызды кеңейту мақсатында жазғы шатырлы лагерь ашып отырмыз. Балалардың бос уақыты мен жазғы демалысын ұйымдастыру – жалпы білім беру жүйесінің маңызды міндеті. Мұнда 1-8 сынып оқушылары демалып, шахмат және дойбы, таза ауада ұлттық ойындар ойнайды, ал бақшада жұмыс істейтіндер үшін гүл, түрлі көкөніс дақылдарын отырғызу мүмкіндігі бар. Аумағы 3 гектар болатын табиғат аясында жылыжайлар, бақтар орналасқан, олар бау-бақша жұмыстарымен, пайдалы еңбекпен айналысуға мүмкіндік береді. Демалысты ұйымдастыруға қала мен ауданның 15 білім беру мекемесімен бірлескен ынтымақтастық туралы келісімшарт жасастық. Лагерь дүйсенбіден жұмаға дейін, аптасына 5 күн, үш сағаттан жұмыс істейтін болады. Алда сіздерді тамаша күндер, көңілді бағдарламалар мен ұмытылмас сәттер күтіп тұр, – деді Айнагүл Мұқанқызы.
Мерекеге келген қонақтар атынан Талғар қаласының әкімі Арыстанбек Әбілқайырұлы, аудандық мәдениет, спорт және тілдер бөлімінің басшысы Фарида Бегенбаева сөз алып, балаларға жақсы демалыс тіледі.
Шара соңында қатысушылар аудан өнерпаздары дайындаған концертті тамашалап, рухани ләззат алды. Осылайша, талғарлық балалардың жазғы демалыс маусымы басталып кетті.
Құтмағамбет ҚОНЫСБАЙ
Талғар ауданы
