Балқаш аудандық Мәдениет үйінде Екінші дүниежүзілік соғыс ардагері, «Құрмет белгісі», екі мәрте «Еңбек Қызыл ту» және І-ІІ-ші дәрежелі «Отан соғысы» ордендері мен көптеген медальдардың иегері атанған, 1969-1984 жылдары аралығында Балқаш аудандық партия комитетінің бірінші хатшысы болып қызмет атқарған Әниятулла Ахметовтың еңбегі ел есінде. Қоғам қайраткерінің 100 жылдық мерейтойы аясында тарихи-танымдық конференция ұйымдастырылып, «Тұғыры биік тұлға» атты жаңа кітаптың тұсауы кесілді.
Ел-жұртына еселі еңбегі сіңген тұлғаның мерейтойына орай ұйымдастырылған мәдени шара басталмас бұрын аталмыш конференцияға арнайы келген қонақтар аудандық кітапхана қызметкерлері дайындаған «Шежіре тұнған, асылдар туған құт мекен» тақырыбында кітап көрмесі мен Көктал ауылындағы Ә.Ахметұлы атындағы орта мектеп ішінен ашылған музейдің көшпелі экспонаттарын аралап, ол жерде әз ағаның тіршілігінде қолданған дүниелері мен қызмет барысында түскен фотосуреттерін тамашалады. Конференцияда арнайы сөз кезегін алған құрметті қонақтар Әниятулла Ахметовтың өмір жолына тоқталып, естелік әңгімелерді өрбітті.
Мәдени шара барысында аудан әкімі Азат Құтпанбетов, Алматы облысының және Балқаш ауданының Құрметті азаматы Тынышбай Досымбеков, Ә.Ахметовпен қызметтес болған Жолтай Балтабеков және немересі Нүсіпжан Хамидоллаұлы, Қазақстан және Әлем халықтары Жазушылар одағының мүшесі, «Тұғыры биік тұлға» кітабының авторы Зарыққан Әбілқасымұлы, сондай-ақ аталмыш жаңа кітаптың демеушілері Әбдіжаппар Қыстаубаев, Мұратбек Бейсебеков пен Бақытжан Хамзин сахна төріне құрметпен шақырылып, Ә.Ахметовтың 100 жылдығына орай жарық көрген жаңа кітаптың тұсауы кесілді.
Бұдан кейін аудандық Мәдениет үйінің жанынан құрылған «Бақанас» театрының өнерпаздары «Шалқыма» әнінің шығу тарихын сахналады. Халқының сүйікті перзенті болған қайраткердің 100 жылдық мерейтойында әуезді ән шырқалып, күмбірлете күй ойнап, мың бұралған бишілердің қатысуымен өткен мерекелік шара көптің есінде ұзақ уақытқа дейін ұмытылмай жүретіндей жоғары деңгейде ұйымдастырылды.
Мерекелік шарадан соң «Ақ Отау» мейрамханасында әз ағаның рухына Құран кәрім бағышталып, ас берілді.
Әният Ахметовтың тұлғалық болмысын айшықтап, сара жолындағы дара ізін жас ұрпаққа насихаттау сол заманда үзеңгілес болып, бірге қызмет атқарған һәм көзін көрген қазіргі аға буын өкілдерінің адами парызы болып қала бермек.
Бақтығали ДӘУІТБАЕВ
Балқаш ауданы
