Үндістан Республикасының Қазақстандағы Елшілігі мен Алматы облысы әкімдігінің бірлесе ұйымдастыруымен туризм саласы мен өзара сауда-саттықты дамытуға арналған бизнес-форум өтті.
Resident City қонақ үйінде өткен шараға үнді елінен 50-ден аса туристік компаниялардың операторлары, агенттері мен гидтері, медициналық және теміржол ассоциацияларының өкілдері, тағам дайындау саласының мамандары, Қазақстан жағынан да туристік және қонақ үй кешендерінің өкілдері, авиакомпаниялар қызметкерлері қатысты.
Қазақстан мен Үндістан арасындағы іскерлік қатынастар мен туризмді дамытуға және тәжірибе алмасуға арналған форум әдеттегідей еліміздің туристік өнімдері мен мәдени жобаларының көрмесімен танысудан басталды. Мұнда қонақтарға Қазақстанның туристік мүмкіндіктері көрсетіліп, табиғаттың қайталанбас көрікті жерлері бейнебаян арқылы үнді мамандарының назарына ұсынылды.
Осыдан кейін өткен пленарлық отырыста облыс әкімінің орынбасары Рустам Исатаев сөз алып, өлкеміздің туристік кешендері мен екі ел арасындағы барыс-келіс жайында кеңінен әңгімеледі.
Үндістан Республикасының Қазақстандағы Төтенше және Өкілетті Елшісі Нагендра Прасад үнді елінің ғажайыптарын сөз етіп, отандастарын екі мемлекет арасындағы туристік қатынастарды дамытуға шақырды. Жиынға Үндістан Туризм министрлігінің қосымша хатшысы және бас директоры Суман Билла онлайн түрде қатысып, баяндама жасаса, Қазақстан туристік ассоциациясының директоры Рашида Шайкенова, Үндістан теміржол, туризм және аспаздық корпорациясының бас менеджері Промила Гупта, Алматы облысының өңірлік даму орталығының директоры Ақжол Исақов, Үндістан Сауда-өнеркәсіп палаталары Федерациясы (FICCI) бас директорының орынбасары Анирбан Чаттерджи, «Air Astana» әуе компаниясының өкілі Ұлжан Қайым, Гоа штатының туризм департаментінің директоры Кедар Ашок Найк, «Oi-Qaragai» курортының маркетинг департаментінің директоры Абзал Қасанаев, «Apollo» госпитальдар тобының халықаралық істер жөніндегі вице-президенті Картик Анантараман өз елдерінің жетістіктері мен туристік мүмкіндіктері туралы айтып, туризм саласын одан әрі дамыту жайындағы ойларын ортаға салды.
Форумда Қазақстан мен Үндістанның мамандары бірлесе жұмыс жасап, жаңа жобаларды жүзеге асыру тетіктерін қарастырып, жекелеген бағыттар бойынша нақты келісім жасауға қол жеткізді. Осылайша алдағы уақытта туризмді дамытуға қажетті қосымша мүмкіндіктерге жол ашылып, іскерлік қатынастарға қатысты құжаттарға қол қойылды.
Қуат Қайранбаев
Алматы қаласы
