Гандболдан балалар мен жасөспірімдер арасындағы облыстық чемпионат мәресіне жетті. Іле ауданындағы спорт мектебінде өткен айтулы бәсекеде әр ауданнан 2010-2013 жылдары туған ұл-қыздар бақ сынады.
Аталған жарыс салауатты өмір салты мен спортты насихаттауға арналған. Өңірлік бәсекеде үздік нәтиже көрсеткен спортшылар биыл күзде өтетін ел чемпионатында облыстың намысын қорғайтын болады.
«Гандбол жылдамдық пен ептілікті қажет етеді. Бұл командалық ойын болғандықтан, жұдырықтай жұмыла білу керек. Сонда ғана жеңіске қол жеткізе алады. Осындай жарыстар жас спортшылардың шеберлігін шыңдап, олардың әлемдік аренаға шығуына жол ашады. Бүгінгі таңда облысымыздан қанаттанған спортшылар ұлттық құрама сапында ел мерейін үстем етіп жүр.. Әсіресе, біздің «Алатау арулары» командасының жетістіктері айтуға тұрарлық, – деді гандболдан облыстағы бас жаттықтырушы Жанат Байарыстанова.
Жарыс қорытындысы бойынша ұлдар арасында Іле ауданының спортшылары үздік шықты, ал қыздар арасында Еңбекшіқазақ ауданының командасы жеңімпаз атанды. Айта кетейік, чемпионаттың өтуіне облыстық дене шынықтыру және спорт басқармасы, облыстық дене шынықтыру және спортты дамыту орталығы, сондай-ақ гандбол федерациясы мұрындық болды.
Өз тілшіміз
