Ауыл тұрғындарына жоғары сапалы диагностикалық қызметті қолжетімді ету мақсатында «QH Денсаулық жолы» қайырымдылық жобасы белсенді түрде жүзеге асырылуда. Жыл басынан бері облыстық денсаулық сақтау басқармасының қолдауымен Алматы аймақтық көпсалалы клиникасы жылжымалы медициналық кешеннің көмегімен шалғай елдімекен тұрғындарын тексеруден өткізді. Жылжымалы медициналық кешен Талғар, Жамбыл, Еңбекшіқазақ, Қарасай, Іле аудандары мен Шелек ауылын аралады.
«Жылжымалы кешеннің арқасында ауыл тұрғындарының медициналық тексеруден өтіп, уақыты мен қаражатын үнемдеуіне мүмкіндік ашылды. Бұл шалғайдағы халық үшін аса маңызды», – деді Алматы аймақтық көпсалалы клиникасының директоры Саяхат Олжаев.
Биылғы ақпаннан мамыр айына дейінгі аралықта 5 350 адам тексеруден өтті. Оның ішінде 1 648 әйелге маммография, 1 401 адамға компьютерлік томография жүргізілді. Тексеру нәтижесінде 8 адамның қатерлі ісікке шалдыққаны мәлім болса, 123 адамнан қатерлі ісіктің белгілері байқалды. 156 тексерілушіден обыр алды жағдайы анықталды.
«Ерте диагностика – сәтті емдеудің кілті. Жылжымалы кешендердің көмегімен біз қатерлі ісік ауруларын ерте сатысында анықтауға мүмкіндік алып отырмыз. Бұл – адамдардың өмірін сақтап қалудың бір жолы», – деді Саяхат Олжаев.
Жылжымалы медициналық кешен маусым айында Қарасай және Ұйғыр аудандарының тұрғындарын тексеруден өткізеді. Ол арқылы жоғары сапалы медициналық қызмет көрсетіп, денсаулық сақтау жүйесінің қолжетімділігін арттыру көзделіп отыр.
Алма ЕСЕНБАЙ
