Соңғы уақытта №4 жағажай жайында халық арасында теріс пікір тудыратын ақпараттар тарауда. Осыған байланысты Қонаев қаласы әкімдігі түсініктеме берді.
Ең алдымен бұл жағажайдың қала иелігінде екенін айта кетейік. Сенімгерлік басқаруға «Жасыл қала Қонаев» мекемесіне берілген. «Яна Ужбетова» ЖК (Бауыржан Ужбетов) жылдар бойы жағажайды жалға алып келеді.
Былтыр кәсіпкердің іс-әрекеттеріне қатысты қала әкімдігіне тұрғындардан бірнеше шағым түскен. Осыған қарамастан, «Жасыл қала Қонаев» мекемесі биыл да кәсіпкермен үш ай шомылу маусымына келісімшартқа отырды. Ол келісімшартта қос тараптың міндеттері түгелдей жазылған.
Сондай-ақ жағажайды кәсіпкер өз бетінше қоршап қойған болатын. Қала әкімдігінің талабымен ол қоршау алынды. Одан бөлек, кәсіпкердің жағажайға кіруі үшін жаяу адамдардан ақы алғаны туралы былтыр деректер тіркелген. Бұл кемшілік те талаптар қою арқылы жойылды. Бүгінде аталған жағажайда құтқарушы мұнарасы мен медпункт жоқ. Осыған байланысты «Жасыл қала Қонаев» мекемесі ескертпе берді. Қазір кәсіпкер тұрақ үшін ақы алады.
Енді жоспарға келсек, алдағы уақытта №5 жағажай секілді қаладағы 6 шақырым жағажайды абаттандыру жоспарлануда. Қазіргі таңда жобалық-сметалық құжаттары әзірленуде. Бұл туралы бұған дейін жазғанбыз. Жоспарға №4 жағажай да кіреді.
Қала әкімдігі шағын және орта бизнес өкілдерін, инвесторларды қолдауға әрдайым дайын. Кәсіпкерлердің құқығын шектеуге жол жоқ.
Халықты бейресми деректерге сенбеуін сұраймыз. Сонымен қатар жалған ақпарат тарату және жала жабу іс-әрекеттері ҚР Заңнамасы аясында қарастырылатынын еске саламыз.
