Қоғамдағы тұрақтылық пен келісім – еліміздің басты құндылығы. Алматы облысында 100-ден астам этнос өкілі бірлігі жарасып, тату-тәтті ғұмыр кешуде. Олардың барлығына мәдениетін, дәстүрі мен ана тілін сақтау және дамыту үшін тең жағдай жасалған. Соның бір көрінісі – Қапшағай су қоймасы жағалауындағы «Ақжайық» демалыс аймағында өткен «Аймақтық казак ойындары – Шермиция» фестивалі. Қазіргі кезде Шермиция дәстүрлі казак мерекесі саналады. Бұл – физикалық белсенділік пен дәстүрлі өмір салтын насихаттайтын жарыс.
Қазақстан халқы Ассамблеясының – 30, Жеңістің – 80 және Жетісу казактары одағының 30 жылдығы сияқты маңызды мерейтойларға орайластырылып, «Бірлігіміз – әралуандықта» арнайы жобасы аясында ұйымдастырылған іс-шара Қазақстан Республикасының Мемлекеттік Гимнімен шымылдық түрді.
Фестивальдің салтанатты ашылу рәсімінде алғашқы сөз кезегін алған Ресей Федерациясының Алматы қаласындағы Бас консулдығының кеңесшісі Александр Морозов шараның өтуіне қолдау көрсеткен облыс әкімі Марат Сұлтанғазиевке, қала әкімі Асхат Бердіхановқа, қоғамдық келісім және даму орталығының директоры Елбосын Абайға алғыс айтты. Одан кейін Қонаев қалалық ақсақалдар кеңесінің мүшесі, спорт ардагері Қанат Жақыпов сөз алып, мұндай жарыстың қалада алғаш рет жалауы желбіреп отырғанын атап өтіп, қатысушыларға сәттілік тіледі.
Келесі сөз Жетісу казактары одағының атаманы, Қазақстанның орыс, славян және казак ұйымдары қауымдастығының Алматы қаласындағы филиалының төрағасы Владимир Шихотовқа берілді.
– Бүгінгі фестиваль тек казак мәдениетінің мерекесі емес, бұл – халықтар достығының жарқын белгісі, мәдени дәстүрлердің жаңғыруы, ұрпақтар бірлігі мен сабақтастығының көрінісі. Шермиция ойыны казактардың тарихи тамырын, құндылықтары мен дәстүрін сақтауға септігін тигізеді. Сондай-ақ бірлігі жарасқан халқымыздың ынтымағын нығайтатыны анық. Шермиция – казак этноойыны казактардың ептілігін, күшін, төзімділігі мен рухын көрсететін дәстүрлі сайыс. Қазақстандық патриотизмді қалыптастырып, өскелең ұрпақтың физикалық дайындығын күшейтетін жарысқа Алматы мен Шымкент қалаларынан, Қарағанды, Жетісу мен Алматы облысынан белсенді ойыншылар қатысуда, – деген атаман көпшілікті ойын ережесімен таныстырды. Сонымен қатар жиналғандарды мерекемен құттықтаған Евгений әкей Христан дінінің рәсімдерін орындап, дұға оқыды.
Келесі кезекте қоғамдық келісім және даму орталығы директорының орынбасары Айымжан Тәңірбергенова Қазақстан халқының мәдени дәстүрлері мен мұраларын сақтауға және дамытуға, халық шығармашылығын насихаттауға үлес қосқан азаматтарға Алғыс хат табыстады.
Көптен күткен жарыс та басталды. Қазақстан аумағында тұратын этностар арасындағы достықты нығайтуға бағытталған ойынға қатысуға казак қоғамдарының, әскери-патриоттық клубтардың, спорт секцияларының, отбасылық, жастар және этномәдени бірлестіктердің өкілдері ниет білдіріпті. Сайыста бақ сынаушылар жерге төселген көлік дөңгелектерінен тепе-теңдікті жоғалтпай, жылдам жүгіріп өтіп, төмен орналасқан ағаш жолақтардың астынан еңбектеп шығып, пневматикалық мылтықтан нысанаға үш рет оқ атты. Одан кейін орналастырылған ағаш шеңберлерден құламай өткеннен кейін, садақпен, спорттық балта және пышақпен үш мәртеден нысананы көздеп, су құйылған құты мен ілулі тұрған арқанды қылышпен шауып түсіріп, көпір арқылы жүгіріп, мәреге жетті.
Фестиваль шеңберінде көрермендер назарына казак ұжымдарының концертік бағдарламасы ұсынылды. Жарыс қорытындысы шығарылғаннан кейін атаман Владимир Шихотов жүлдегерлерді марапаттады.
Айжарық КӨПТІЛЕУОВ
