Балқаш ауданына арнайы іссапармен келген ҚР Парламенті Мәжілісінің депутаты Данияр Қасқарауов, Бақанас ауылының тұрғындарымен кездесіп, олардың жеке мәселелеріне құлақ түрді. Халық қалаулысымен өткен кездесуге аудан әкімінің міндетін уақытша атқарушы Асқар Кәдірұлы, мәслихат төрағасы Кәдірбек Омаров, сондай-ақ бірқатар мекеме-ұйымдардың басшылары, ауыл тұрғындары қатысты.
Кездесу барысында ауыл тұрғындары бау-бақша өнімдерін егу үшін мемлекеттік жер қоры есебінен жер телімін алу және жоғалған тұрғын үй құжатын қалпына келтіру мәселелерінің қиындық туғызып жүргенін айтты. Сонымен қатар интернет желісінің жылдамдығы сын көтермейтінін, аудандық орталық аурухананың тіс емдеу бөліміне тіс рентген құрылғысының қажет екенін алға тартты.
Тұрғындар тарапынан қойылған сауалдарға құлақ түрген Данияр Алдабергенұлы аудандық мекеме басшыларына көтерілген барлық мәселенің шешілу жолдарын қарастыру жөнінде ұсыныс білдірді.
Мұнан соң Данияр Қасқарауов аудан орталығындағы М.Сеңгірбаев атындағы орта мектебіне барып, аталмыш білім шаңырағына күрделі жөндеу жұмысын жүргізіп жатқан «Сем-Шоғы Құрылыс-Сервис» жауапкершілігі шектеулі серіктестігінің прорабы Нұрлан Төребекпен сұхбаттасып, құрылыс жұмыстарының мән-жайын сұрады. Әрбір қағылған шеге мен қаланған кірпіштің сапалы болып, жаңа оқу жылына дейін күрделі жөндеу жұмысы аяқталса деген тілегін айтты.
Келесі кезекте халық қалаулысы өзінің іссапарын аудандық дене шынықтыру спорт кешенінде жалғастырып, ол жерде аудандық балалар мен жасөспірімдер спорт мектебінің басшысы Руслан Әбдірзақовпен аудан спортшылары жайында әңгіме өрбітіп, бақ дарыған қасиетті Балқаш өңірінен әлем және олимпиада жеңімпаздарының шығатынына сенім білдірді.
Депутаттар – халық пен биліктің арасын жалғап тұрған алтын көпір. Олар қашанда халық игілігі үшін еңбек етіп, еліміздің дамуына үлес қосып келеді. Халық арасында жүріп, олардың мұң- мұқтажын тыңдап, оны Парламент қабырғасында көтеріп, мәселенің шешілуіне атсалысады. Бақ дарып, қыдыр қонған өңірге арнайы атбасын бұрған ҚР Парламенті Мәжілісінің депутаты Данияр Алдабергенұлына да балқаштықтардың артар сенімі зор.
Бақтығали ДӘУІТБАЕВ
Балқаш ауданы
