Қонаев қаласында жағалау аумағына тұрақты мониторинг жүргізілуде. Негізгі мақсат – қоғамдық тәртіп пен санитарлық тазалықты қамтамасыз ету және оқыс оқиғалардың алдын алу.
Қонаев қаласы әкімдігі баспасөз қызметінің хабарлауынша, күн сайын жағалауда 12 полиция қызметкері кезекшілік атқарады. Демалыс және мереке күндері олардың саны көбейтіледі – Алматы облыстық ПД және Қонаев қалалық ПБ-нің 13 маманы жұмылдырылады. Кейбір күндері патрульдеуге Ұлттық ұланның әскери қызметшілері де тартылады.
Маусым басталғалы бері 197 әкімшілік құқықбұзушылық тіркелді:
• 41 – абаттандыру ережелерін бұзу,
• 39 – қоғамдық орында алкоголь ішу,
• 15 – мас күйінде көлік басқару,
• 8 – темекіге қарсы заңнаманы бұзу,
• 27 – жол қозғалысы ережелерін бұзу және т.б.
Биыл №5 жағажайда жасанды интеллектпен жабдықталған бейнекамералар орнатылды. Олар қызыл шеңберден асып, жүзген адамдарды тіркеп, ТЖД-ның кезекші бөліміне хабарлама жібереді. Бұл жедел әрекет етуге мүмкіндік береді.
Сонымен қатар ТЖД, полиция, санитарлық қызмет пен туристік кәсіп иелерінің қатысуымен 3-тен астам кеңес өткізілді. Кәсіпкерлерге қауіпсіздік талаптары түсіндіріліп, құтқарушыларды тегін оқыту, су түбін тексеру және дайындық актілерін рәсімдеу мүмкіндігі ұсынылды.
