Жамбыл ауданы әкімдігінің үлкен мәжіліс залында 2025 жылғы Ұлттық ауылшаруашылық санағын өткізуге дайындық жұмыстары бойынша кеңейтілген жиын өтті. Онда мемлекеттік маңызы үлкен шараны тиісті деңгейде ұйымдастырып, атқару мәселелері талқыланды.
Жиынға Қазақстан Республикасының Стратегиялық жоспарлау және реформалар агенттігі Ұлттық статистика бюросының Алматы облысы бойынша статистика департаментінің өндіріс статистикасы басқармасының басшысы Жеңісгүл Жолдыбаева, мемлекеттік мекемелердің басшылары, ауылдық округ әкімдері, салалық бөлім басшылары, аудандық статистика басқармасының жауапты мамандары қатысты. Ауыл шаруашылығы санағы Қазақстанның барлық өңірін қамтиды. Оның мақсаты – аграрлық сектордың жай-күйі туралы нақты әрі өзекті ақпарат жинау. Онда пайдаланылатын жер құрылымы, шаруашылық жүргізу нысандары, мал басының саны, техникамен қамтамасыз ету және басқа да маңызды көрсеткіштер анықталады. Жиналған мәліметтер аграрлық саясат пен мемлекеттік қолдау шараларын тиімді қабылдауға негіз болатыны айтылды. Жиында Ұлттық ауылшаруашылық санағын ұйымдастыру кезеңдері, ақпараттық-насихат жұмыстары, онлайн режимде өтетін сауалнамаларды тиімді жүргізу, жауапты мамандарды бекіту және техникалық жабдықтау мәселелері жан-жақты қаралды.
Басқосуды жүргізген Жамбыл ауданы әкімінің орынбасары Ақниет Тұматаев бұл санақтың ауыл шаруашылығы саласындағы нақты деректер базасын қалыптастыру үшін аса маңызды екенін атап өтті. Аудандық статистика бөлімінің басшысы Гүлнар Әбдімолдаева маңызды науқанға мамандардың әзірлігі мен техникалық дайындық барысы жайында хабарлама жасады. Аудан әкімінің орынбасары әрі міндетін уақытша атқарушы Ақниет Тұрысбекұлы әрбір округ әкімдері мен жауапты сала мамандарына тиісті тапсырмалар жүктеді. Сондай-ақ онлайн санақтың белгіленген уақытында және сапалы жүргізілуін қамтамасыз етуді, халықпен тығыз ақпараттық жұмыс жүргізуді тапсырды. Жиын соңында қатысушылар тарапынан айтылған ұсыныстар мен қойылған сұрақтар тыңдалып, нақты шаралар белгіленді.
Серік САТЫБАЛДИЕВ
Жамбыл ауданы
