Алматы облысы әкімдігінің қолдауымен, облыстық ветеринария басқармасы, ҚР Ауыл шаруашылығы министрлігі Ветеринариялық бақылау және қадағалау комитетінің Алматы облыстық аумақтық инспекциясы және облыстық ветеринариялық стансаның ұйымдастыруымен Қонаев қаласындағы орта мектеп-гимназиясында Ветеринария қызметкерлерінің күніне арналған салтанатты шара өтті. Мерекелік жиында мал дәрігерлерінің еселі еңбегі айтылып, саладағы тың серпіндер тілге тиек етілді.
2023 жылдан бері 10 шілде елімізде ресми түрде Ветеринария күні ретінде белгіленіп, тұрақты түрде аталып келеді. Бұл – тек малдың ғана емес, тұтас адамзаттың саулығын сақтауда маңызды рөл атқаратын мамандық иелерінің мәртебесін айқындайтын айтулы күн. Ветеринарлар індеттің алдын алып, азық-түлік қауіпсіздігін қадағалап, ауыл шаруашылығының өркендеуіне үлес қосып келеді. Салтанатты шараның шымылдығын ашқан облыс әкімінің орынбасары Бақытнұр Бақытұлы ветеринар мамандығының жай жұмыс емес, бұл – шын мәніндегі үлкен миссия екенін атап өтіп, сала қызметкерлерінің қажырлы еңбегіне тоқталды. Ол өз сөзінде:
– Сіздердің күнделікті еңбектеріңіздің арқасында ел азығының қауіпсіздігі қамтамасыз етіліп, адамдар мен жануарлардың денсаулығы қорғалады. Бүгін – ел саулығының қалқаны болып жүрген жандарға құрмет көрсету күні, – деп ақжарма тілегін ақтарды.
Салтанатты шара барысында ветеринария саласында үздік деп танылған қызметкерлерге облыс басшылығы, ветеринария басқармасының басшысы мен ҚР Ауыл шаруашылығы министрінің атынан Құрмет грамоталары, Алғыс хаттар берілді. Мерекелік жиынның басты бағалы сыйлығы ретінде облыстың ветеринариялық қызметіне 14 жаңа қызметтік көліктің кілті салтанатты түрде табысталды. Жалпы құны 104 миллион теңгені құрайтын заманауи техника сала жұмысын жеңілдетіп, мамандар қызметін жандандыра түспек. Осы орайда Бақытнұр Бақытұлы:
– Бұл көліктер шалғай ауылдарға дер кезінде барып, сапалы қызмет көрсетуге мүмкіндік береді. Ветеринарлық бригадалардың жылдамдығы мен тиімділігін арттырады, – деді.
Салтанатты шара барысында көп жылдық еңбегімен өңірдің ветеринариялық қызметін дамытуға зор үлес қосқан ардагерлерге де ерекше құрмет көрсетілді. Мал шаруашылығы мен ветеринариялық медицинаға арналған заманауи технологиялар мен жабдықтардың көрмесі де көпшіліктің назарына ұсынылып, Сүйінбай атындағы облыстық филармонияның өнерпаздары ән-биден шашу шашты. Ветеринария күні – тек салалық мейрам ғана емес, мемлекет тарапынан ветеринария қызметіне көрсетілетін қолдаудың көрінісі. Жаңа техниканың табысталуы, үздіктердің марапатталуы, ардагерлердің құрметке бөленуі – бұл саланың ел саулығы мен ауыл шаруашылығындағы маңызды рөлін тағы бір мәрте айшықтап берді.
Құралбек СӘБИТОВ
