Соңғы жылдары өңірімізде салынып жатқан тұрғын үйлер мен ғимараттардың қарқынына қарасақ, аудан экономикасының көш ілгері қадам басқанын аңғарамыз. Биыл да Балқаш ауданында осындай көңіл көншітерлік жұмыстар қолға алынуда. Сондай құрылыс нысанының бірі – Бақанас ауылындағы М.Сеңгірбаев атындағы орта мектеп ғимаратының күрделі жөндеу жұмысы.
Білім ошағының құрылыс жұмысы оқу жылы аяқталып, мектеп оқушылары жазғы демалысқа шыққан сәтте басталып кетті. Қазіргі таңда құрылыс жұмысы қарқынды жүргізіліп жатыр деп айтуға толықтай негіз бар.
Мектептің күрделі жөндеуін жаңа оқу жылы басталғанға дейін аяқтау жоспарланған. Қарқынды бастау алған құрылыс нысанына аудандық білім бөлімінің басшысы Шолпан Қошахановамен бірге арнайы барып, ол жердегі жұмыстың мән-жайыны қанықтық.
Мектеп ғимаратына күрделі жөндеу жұмысын жүргізіп жатқан «Сем-Шоғы Құрылыс-Сервис» жауапкершілігі шектеулі серіктестіктің прорабы Нұрлан Төребек нысанды аралатып, құрылыс сызбасымен таныстырды. Мұндағы жұмыс ауанын бағамдау барысында аңғарғаным, керек емес бөлшектерді бұзу, құрылыс қалдығын тазалау жұмысының 90 пайызы жасалған. Мектеп ғимаратының есік-терезелері алынып, дәліздер мен спортзал, асхана, сынып бөлмелері қабырғаларының ескі сылақтары тазаланып, жаңа сылақ бекем ұстауы үшін торлама темірлер орнатылған. Алдағы күндері торлама темірлер орнатылған ғимарат қабырғаларын сылау жұмысы басталады.
«Сем-Шоғы Құрылыс-Сервис» ЖШС-ның прорабы Нұрлан Төребектің айтуынша, мектеп ғимаратының есік-терезелері түгелдей ауыстырылып, сырт келбеті заманауи нұсқада қапталады. Құрылыс басталған сәтте 60 адам жұмысқа қабылданған. Олардың арасында аудан азаматтары да бар. Ауыл тұрғындарының бірі – Абзал Шорабаев. Ол өзінің көмекшісі Жәнібек Тоқтағановпен бірге ғимарат қабырғасына орнатылған торлама темірлерді бекітіп жатты. Ал сылақ жасау жұмысын ойдағыдай атқарып жүрген Бақанас ауылының тұрғыны Елдос Кеңесбекпен сұхбаттасқанымда ол ауыл азаматтарының тұрақты жұмыспен қамтамасыз етілгеніне және жетпіс жылдан астам тарихы бар білім шаңырағына күрделі жөндеу жасалып жатқанына қуанатынын жеткізді.
Мұндағы құрышқолды құрылысшылардың қайсы бірін алсаңда өз ісінің хас шебері болып алған. Жүктелген міндеттерін лайықты атқаруда. Оған жұмыс барысында көз жеткіздік. Олардың мақсаты – тезірек құрылыс жұмысын аяқтап, жаңа оқу жылында жеткіншектердің жаңа мектепке қуана қадам басқанын көру. Ол қуанышты сәтті көрер уақыт та алыс емес.
Бақтығали ДӘУІТБАЕВ
Балқаш ауданы
