Президент Қасым-Жомарт Тоқаев өзінің халыққа арнаған Жолдауында «Заң мен тәртіп» қағидатын қоғамның басты ұстыны етіп ұсынды. Ел болашағының жарқын болуы үшін азаматтардың, әсіресе жастардың, тәртіпке мойынсұнуы мен заңға құрметпен қарауын ерекше атап өтті. Осы үндеуге үн қосқан Алматы облысының жастары құқықбұзушылықтың алдын алуға бағытталған нәтижелі шараларды іске асырып келеді.
Жыл басынан бері «Заң мен тәртіп үстемдігі – тұрақтылықтың кепілі» тақырыбында 20-дан астам кездесу өткізіліп, 1000-ға жуық жас қамтылған. Бұл басқосуларда әсіресе есірткі мен нашақорлыққа қарсы күрес, вандализм, лудомания сияқты қоғамға жат құбылыстардың алдын алуға басымдық берілді. Осы орайда облыстық жастар ресурстық орталығының бөлім басшысы Шыңғыс Мұқашев:
– Бұл жұмыстар жастардың құқықтық сауаттылығын арттырып, қоғамдық тәртіпке бейімдеу үшін жасалды. Қоғамдағы заңсыздықтарға қарсы иммунитет қалыптастырудың бірден-бір жолы – жастардың құқықтық танымын кеңейтіп, сыбайлас жемқорлық пен тәртіпсіздікке төзбеушілік көзқарас орнату, – деп осы мақсатта өткен кездесулерге әр саланың білікті мамандары арнайы шақырылғанын айтып, онда жастарға әсер ететін нақты мысалдар айтылып, терең ой салатын сұхбаттар өткізілгенін алға тартты.
Аталған кездесулер облысымыздың түпкір-түкпірінде ұйымдастырылды. Шара барысында полиция департаменті, прокуратура, сыбайлас жемқорлыққа қарсы іс-қимыл агенттігі, сондай-ақ сала ардагерлері жастармен ашық сұхбат жүргізіп, тәжірибелерімен бөлісті. Олар әрбір заң бұзушылықтың арты қандай салдарға әкелетінін түсіндіріп, азаматтық жауапкершілік пен заң алдындағы міндет туралы кеңінен баяндады. Полиция ардагерлерінің төрағасы Қалижан Алпысбаев заңға құрмет – адал азаматқа тән қасиет, тәртіпке бағыну – өркениетті қоғамның белгісі екенін жеткізді. Ол өз сөзінде:
– Мен бұл салада ұзақ жыл еңбек еттім. Қоғамға іріткі салатын әрекеттерге жол бермеу – баршамыздың міндетіміз. Оның ішінде аға буын өкілдерінің тәрбиелік рөлі өте зор. Жастар заңсыздықтың салдарын ұғынып өсуі қажет. Себебі бұл тек жеке адамның емес, бүтін бір ұлттың тағдырына әсер етеді, – деді.
Басқосуға облыстық прокуратураның ардагерлер кеңесі төрағасы Әбдіберік Әділбеков, облыс прокурорының көмекшісі, бөлім бастығы Алмас Жалғасов, ҚР сыбайлас жемқорлыққа қарсы іс-қимыл агенттігінің облыстық департамент басшысының бірінші орынбасары Айдос Мамыт, облыстық полиция департаменті бастығының орынбасары Арман Тіленшин, сондай-ақ полиция полковнигі Жанар Көптілеуова сынды білікті мамандар қатысты. Олар жастармен еркін форматта тілдесіп, құқықтық сауаттылықты арттыруға сүбелі үлес қосты. ҚР Конституциясының 30 жылдығы аясында заң үстемдігіне айрықша басымдық беру керектігі де айтылды. Бұл ұстанымды жастар санасына сіңіру, оларды құқық бұзушылықтан сақтандыру – бүгінгі күннің өзекті мәселесі. Ал атқарылып жатқан жұмыстар осы жолдағы нақты әрі нәтижелі қадам болып отыр.
Құралбек СӘБИТОВ
