Облыс әкімі Марат Сұлтанғазиев Қытай Халық Республикасының Чжэцзян провинциясынан келген делегацияны қабылдады. Кездесуде екіжақты әріптестікті дамыту, бірлескен жобалар, инвестиция тарту, логистика, агроөнеркәсіп және жасыл энергетика салаларындағы ынтымақтастық мәселелері талқыланды.
Аймақ басшысы қонақтарға алдымен облысымыздың әлеуметтік экономикалық дамуы жайында айтып берді. Өңірдің ел экономикасында көлемі жағынан 5-орынға көтеріліп, жоғары әлеуетке ие аймақ ретінде танылып отырғанын жеткізді. «Алматы облысы мен Қытай Халық Республикасының провинциялар арасындағы достық және өзара тиімді селбестік нәтижесінде аймақтың Қытаймен тауар айналымы дәстүрлі түрде жоғары деңгейде сақталып келеді. Соңғы екі жылда бұл көрсеткіш тұрақты түрде 1 млрд АҚШ долларынан асып отыр. 2024 жылы тауар айналымы 1 млрд 23 млн АҚШ долларын құрады. Бүгінде Алматы облысында Қытай капиталының және бірлескен капиталдың қатысуымен 150-ге жуық кәсіпорын жұмыс істейді. Бұл – екіжақты іскерлік ынтымақтастықтың жоғары деңгейінің айғағы. Бүгінде өңірде ауқымды инфрақұрылымдық және инвестициялық жобалар белсенді түрде іске асырылуда. Ел Президенті Қасым-Жомарт Тоқаев «Қазақстан Шығыс пен Батыс, Қытай мен жаһандық нарықтар арасындағы көпір болуға ниетті», деген еді. Сондықтан біз Чжэцзян провинциясында сенімді және перспективалы серіктесті көреміз. Әріптестік аясында ауыл шаруашылығы саласында бірлескен кәсіпорындар құру мен инфрақұрылымды дамыту бағытындағы жобаларды жүзеге асыруға күш саламыз», деген Марат Елеусізұлы көрші елдің өкілдерін өңдеу өнеркәсібі, электротехника, құрылыс, туризм, ауыл шаруашылығы өнімдерін өңдеу сынды салаларда бірлесе жұмыс істеуге шақырды.
Келесі кезекте Чжэцзян провинциясы саяси-құқықтық істер комитетінің хатшысы Ван Чэнго сөз алып, жылы қабылдағаны үшін облыс басшысына алғыс айтты. Ол Чжэцзян провинциясының әлеуметтік экономикалық жайын баяндады. Оның айтуынша, Чжэцзян – Қытайдың маңызды өңірлерінің бірі. Орталғы Ханчжоу қаласында Alibaba, DingTalk сынды әлемге әйгілі технологиялық компаниялардың бас кеңселері орналасқан. Сонымен қатар, бұл өңір – шетелге инвестиция салатын ірі жеке компаниялары ең көп шоғырланған Қытай провинциясы саналады. Кездесу нәтижесінде екі тарап логистикалық хабтар құру, бірлескен өндірістер ашу және кадр даярлау бағытында ынтымақтастықты тереңдетуге дайын екендерін білдірді.
Ерзат АСЫЛ
