Ұстаздық жолда талай баланың көзіндегі үміт отын көріп, жүрегіндегі мейірім мен махаббатты сезіп келемін. Сондықтан еліміздегі балалардың тағдыры мен олардың өмір сүру жағдайына бейжай қарай алмаймын. Жақында Қонаев қаласынан ашылған жаңа Балалар үйі жайлы жағымды жаңалықты естіп, ерекше қуанып отырмын.
Балалардың жарқын болашағы мен қауіпсіздігі – ең басты құндылық. Алматы қаласындағы бұрынғы ғимараттың апатты жағдайда болғанын естіп, балалардың сол жерде өмір сүріп келгеніне жаным ауырып еді. Ал енді заманауи талаптарға сай, кең де жарық, барлық мүмкіндіктері қарастырылған жаңа мекеме бой көтеріп, балаларымыз сонда көшіріледі деген хабар – жүрекке жылу береді.
Асхана, ойын алаңы, шығармашылық бөлмелер, кітапхана, медицина бөлмелері – бәрі де баланың жан-жақты дамуына үлкен мүмкіндік бермек. Мұндай қамқорлықты көрген баланың бойында өмірге деген сенім артып, үлкен армандарға қанат қағатынына сенемін.
Осы іске мұрындық болған барша азаматтарға, облыстық білім басқармасына және барлық еңбек етіп жүрген ұжым мүшелеріне шын жүректен алғысымды білдіремін. Балаларымыздың болашағы жарқын, жүректері қуанышқа толы болғай!
Дәметкен Нүсіпбекова,
Ардагер ұстаз, Қонаев қалалық аналар кеңесінің төрағасы
