Бүгін Райымбек ауданында аудан әкімі сайлауы өтіп жатыр. Таңғы 7-ден сайлау учаскелері ашылып, тұрғындар өз таңдауын жасауға асығуда. Сайлау барысы заң талаптарына сай ұйымдастырылған, учаскелерде бақылаушылар мен комиссия мүшелері жұмыс істеуде. Нарынқол ауылындағы №762 сайлау учаскесінде ең алғашқы болып зейнеткер Меліс Садуақас дауыс берді.
– Сайланған әкім осы ауданды көркейтіп, аудан азаматтарына қызмет етеді, әл-ауқатын жақсартады деп сенеміз. Ауыл шаруашылығының дамуына, техникалық жабдықталуына көңіл бөлсе, әкімнің даңқы асқақтай береді. Әкімнің халыққа пайдасы тию керек. Балалардың тәртібі мен оқу үлгерімі де назардан тыс қалмаса дейміз, – деді сайлаушы.
Айта кетейік, дауыс беру кешкі 20:00-ге дейін жалғасады.
