Алматы облысындағы ірі инфрақұрылымдық жобалардың бірі – «Қонаев–Күрті» автомобиль жолының 0–67 шақырымы қалыпқа келіп жатыр. Жобаның мердігері – «Атырауинжстрой-АИС» ЖШС. Ал инженерлік қызметті SP «Egis International» және «CS Consultants» компаниялары атқарады.
Қазіргі уақытта мердігер ұйым 4 жолақтың екеуін толық аяқтаған. Атап айтқанда, ұзындығы 66,7 шақырым учаскеде негіздемеден бастап жоғарғы қабатқа дейінгі құрылыс біткен. Қалған екі жолақта 40 шақырымдық жолдың негізі жасалып, 36 шақырымға асфальтбетонның бірінші қабаты төселді. Сондай-ақ, 21 шақырымға қиыршық мастикалық асфальтбетонның соңғы қабаты салынды. Нысанды жыл соңына дейін пайдалануға беру жоспарланып отыр.
Жұмыстардың сапасы тұрақты түрде «Жол активтері сапасының ұлттық орталығы» ШЖҚ РМК Алматы облыстық филиалы тарапынан бақылауға алынған. Биыл аталған нысанға 3 рет тексеріс жүргізіліп, 24 құрылыс материалы сынақтан өтті. Соның ішінде 9 материал сапа нормасына сәйкес болмай шыққан. Қазір мердігер ұйым анықталған кемшіліктерді жоюды қолға алды.
