Мемлекет басшысының тапсырмасына сәйкес, облыста қайтарылған активтер есебінен Іле ауданында 3 денсаулық сақтау нысанының құрылысы қаржыландырылып, бой көтерді. Оның біреуі Байсерке округі Көктерек ауылында, қалған екеуі – тұрғындары тығыз орналасқан Ащыбұлақ ауылдық округіндегі Көкқайнар елдімекені мен «Жомарт» саяжайында. Соңғы екеуінің құрылысы әлі жүріп жатыр. Басшылықтың айтуынша, қара күзге дейін қос нысан ел игілігіне берілмек.
Іле ауданының әкімі Қайыржан Жақсымбетов, облыстық денсаулық сақтау басқармасы басшысының орынбасары Ләйлә Серікбаева, Іле ауданының прокуроры Бауыржан Төлендинов, ауыл ақсақалдары мен денсаулық сақтау саласының ардагерлері Көктерек ауылындағы 40 орынды жаңа дәрігерлік амбулаторияның ашылу салтанатына қатысты. Аталған әлеуметтік маңызы зор нысан Қазақстан Республикасы Конституциясының 30 жылдық мерекесіне орай пайдалануға берілді. Жаңа мекеме ауыл тұрғындарына алғашқы медициналық-санитарлық көмекті қолжетімді әрі сапалы түрде ұсынуды мақсат етеді.
Жаңа фельдшерлік-акушерлік пункт фельдшерлік қабылдау, жүкті әйелдерге арналған арнайы кабинет, процедуралық шара және егу, физиотерапия, дәрі-дәрмек сақтау қоймасы сияқты маңызды бөлімдермен қамтылған. Құрылысы 2024 жылдың қазан айында басталған бұл нысан жемқорлық фактілері бойынша мемлекет меншігіне қайтарылған қаражат есебінен салынды. Жалпы жер аумағы 70 сотықты құрайды. Ғимараттың жалпы аумағы – 264 шаршы метр. Бір ауысымда 10 адамға дейін қабылдауға қауқарлы. Мекемеде фельдшер, акушер және процедуралық кабинет медбикесі қызмет ететін болады. Сонымен қатар, бала туу жасындағы және жүкті әйелдерді қабылдауға арналған арнайы кабинет те қарастырылған.
Іле ауданының әкімі өз сөзінде: «Бұл нысан – ауыл тұрғындарының өмір сапасын арттыруға бағытталған істің нақты нәтижесі. Ел Президентінің тапсырмасына сәйкес, сапалы әрі қолжетімді медициналық қызметпен қамтамасыз ету жұмыстары жүйелі түрде жалғасатын болады», – деп атап өтті.
Айта кетейік, заңсыз активтерді мемлекетке беру туралы заңнамаға сәйкес қайтарылған қаражат есебінен облыста, соның ішінде, Іле ауданында бірқатар әлеуметтік нысан салынып жатыр.
Бағдат ШОЙБАС
Іле ауданы
