Райымбек ауданында өтіп жатқан әкім сайлауы барысында Нарынқол ауылындағы №763 сайлау учаскесіне Алматы облысының және Райымбек ауданының Құрметті азаматы, Қазақстан Республикасының еңбек сіңірген жаттықтырушысы, аудандық ардагерлер кеңесінің төрағасы Бекболат Бірбаев келіп, өз даусын берді.
Ұзақ жылдар бойы спорт саласында жастарды тәрбиелеп, елге еңбегі сіңген ардагерді учаскедегі жұртшылық ерекше құрметпен қарсы алды.
– Бұл сайлау – ауданымыздың болашағы үшін маңызды сәт. Сайлау туралы Заңға енгізілген соңғы өзгерістерге сәйкес Президентіміз Қасым-Жомарт Тоқаевтың Жарлығымен аудан әкімдерін халық дауыс беру арқылы өзі сайлайды. Осы арқылы әкімдер елге жақын бола түседі. Бір айдан бері олар ауыл-ауылды аралап, үгіт-насихат жұмыстарын жүргізді. Бұл өзгеріс – біз үшін үлкен қуаныш. Аудан тұрғындары ауыл шаруашылығымен айналысатындықтан, жаңа сайланған әкім осы саладағы мәселелердің шешімін табады деп сенеміз, – деді Бекболат Бірбаев.
Сайлау учаскесінде дауыс беру қызу қарқынмен жалғасуда. Тұрғындардың белсенділігі жоғары, олар сайлауға жоғары жауапкершілікпен қарап, ауданның дамуы мен өркендеуіне өз үлестерін қосып жатыр.
