Кеген ауданы Шырғанақ ауылдық аналар кеңесінің төрағасы Роза Батырханованың ұйымдастыруымен республикалық «Мәдениетті ана –мәдениетті ұлт» жобасы аясында Кіші Қарқара ауылында «Өмірі – үлгі-өнеге» атты кездесу кеші өтті. Шараға құрметті қонақ ретінде 93 жасқа келген, он баланы өмірге әкеліп, тәрбиелеп, ұлын ұяға, қызын қияға қондырып, өсіп-өніп отырған Базархан Қыдықова апамыз шақырылды.
Базархан Қыдықова – «Батыр ана», «Алтын алқа» иегері. Жұбайы Әбдіреш Көмекбайұлы екеуі ауылдың өркендеуіне өз үлестерін қосты. 24 немере, 45 шөбере, 10 шөбере сүйді. Асыл әже қазақ халқының салт-дәстүрін сақтай отырып, сырмақ тікті, текемет басты, алаша тоқыды. Оның қолынан шыққан бұйымдары әр баласының үйінде көненің көзіндей сақталған. Ауылдағы замандастарының арасында сыйлы, қонақжай, қарапайым, он саусағынан өнер төгілген шебер адам. Кейінгі ұрпаққа айтар ақылы мен көрсетер өнегесі көп.
Ашық аспан аясында өткен айтулы шараға Кеген аудандық мәслихат төрағасы Алмасбек Нұғыман, аудандық аналар кеңесінің төрағасы Бақытгүл Көнеева және ауыл тұрғындары қатысты. Сәні мен салтанаты жарасқан кеште Базархан әжеге ұрпақтары гүл шоғын сыйлады. Аудандық мәслихат төрағасы әжеміздің өнегелі өмірінен жастар ғибрат алуы керек екенін айтып, Базархан Қыдықованың деніне саулық, отбасына амандық тіледі. Аудандық ардагерлер кеңесінің төрағасы Сабыр Досымбеков пен ардагер-журналист Шыңғыс Тұрсынов, ауыл азаматтары Оразбай Бекбатыров, Серік Саниязов өнегелі ана жайлы ойларымен бөлісті.
Ауылдағы «Әжелер» ансамблі «Замандас» әнін орындаса, «Нұр-Ару» балабақшасының бүлдіршіндері «Әжетайым» әнін шырқап, мың бұрала биледі. Базархан әженің шөберелері «Біздің әже», «Әже мен шөбере», «Қос ана» атты арнау өлеңдерін оқып берді. Ал ұл-қыздары ұлттық құндылық, ұрпақ сабақтастығы туралы сөз қозғап, көпшілікке жылы лебізін білдірді.
Жиын соңында Базархан әжеміз жастарға ақ батасын беріп, естелік суретке түсті.
Дәурен ӘБУТӘЛІПОВ
Кеген ауданы
