Нарынқолда ауыл азаматтары құрған қордың жұмыс істей бастағанына екінші жылдың жүзі болды. Ақ ниет, ыстық ықылас, шынайы тілекпен қолға алған игі іс жүректерге жол тауып, көңілдерді көкке самғатуда.
«Нарынқол азаматтары» қорының мақсаты – ауылдағы аз қамтылған, көпбалалы, күнкөрісі төмен, тағдырдың жазуымен қиындыққа тап болған отбасына қамқор қолын ұсынып, қаржылай көмек көрсету. Сөйтіп қиындықты аз да болса жеңілдетудің жолын табу. Қордың салымшылары – кәсіпкерлер және ауылдың барша тұрғындары. Оларды ешкім үгіттеп немесе мәжбүрлемейді. Әркім өз қалауымен шама-шарқынша үлес қоса алады. Қор жұмыс істеген уақыттан бері оның игілігін көргендер ауылда көптеп саналады.
Жуырда аталған қор тағы бір сауапты іске мұрындық болды. Жыл сайын жаңа оқу жылына санаулы күндер қалғанда «Мектепке жол» акциясы басталатыны белгілі. Биыл осы бір шарапатты шараға «Нарынқол азаматтары» қоры өз тарапынан лайықты үлес қосты. Атап айтқанда, аудан орталығындағы 3 мектепке баратын 60 оқушыға сөмке, түрлі пәндерге арналған дәптер, қалам, басқа да оқу құралдарын сыйға тартты.
Осылайша балалардың жүректерін демдеп, көңілдеріне қуаныш сыйлады. Денсаулықтары зор болып, сапалы білім, саналы тәрбие алуларына тілектестік білдірді.
Жұмабек ТҰРДИЕВ
Райымбек ауданы
