Облыстық білім басқармасы педагогтердің кәсіби өсуіне қолдау көрсету, тиімді тәжірибелер алмасу және жаңа оқу жылының басым бағыттарын айқындау мақсатында Қарасай ауданындағы Қаскелең, Қошмамбет мектептері мен Шамалған ауылындағы көпсалалы колледжде «Білім келешегі: адал азамат – кәсіби маман» тақырыбында панельдік сессия отырысын өткізді.
Пәндік, деңгейлік және басқарушылық бағыттар бойынша құрылған 41 сессия алаңында 1611 педагог оқу бағдарламаларының жаңашылдығын, цифрлық технологиялардың, бағалау жүйесінің ерекшеліктерін және функционалдық сауаттылыққа бағытталған тапсырмаларды талқылап, оқу үрдісін жақсарту мақсатында ұсыныстар қабылдады.
Әдістемелік орталық қызметкерлері, «Өрлеу» кәсіби даму институтының жаттықтырушылары, мектеп, колледж директорлары мен орынбасарлары, балабақша меңгерушілері қатысқан жиын өз жұмысын Қаскелеңдегі мектеп дәлізінде ұйымдастырылған көрмеден бастады. Мұнда барлық аудандар мен қаладағы әдістемелік бөлім басшыларының атқарып жатқан жұмыстары, қол жеткен жетістіктері мен озық тәжірибесі көрініс тапты. Атап айтар болсақ, алқалы жиынға келгендер мектептердегі сандық технология, робототехника, қолөнер бағытындағы жұмыстармен жан-жақты танысты. Көрмеге білім беру мекемелеріне инновациялық шешім әзірлеп, енгізумен айналысатын «Stem Solutions» компаниясының мамандары да қатысты.
– Ең алдымен барша ұстаздарды 2025-2026 жылғы оқу жылының басталуымен құттықтағым келеді! – деді облыстық білім басқармасы басшысының міндетін атқарушы Ақмарал Бақытқызы. – Бүгінгі таңда облыста 437 мемлекеттік мектеп жұмыс істейді, жаңа оқу жылын 362 мыңнан астам оқушымен бастағалы отырмыз. Оларға 35 мыңнан астам ұстаз білім мен тәрбие беретін болады.
«Білім келешегі: адал азамат – кәсіби маман» тақырыбында білім саласы қызметкерлерінің панельдік сессиясына 1700-ге жуық педагог қатысып отыр. Мұнда аудандық, қалалық білім бөлімінің, әдістемелік орталықтардың басшылары, олардың оқу және тәрбие жөніндегі орынбасарлары, педагог-психологтар, әлеуметтік педагогтар мен пән мұғалімдері жаңа оқу жылын тың серпінмен, шығармашылық ізденістермен бастау үшін тәжірибе алмасатын болады. Мектепке қатысты барлық нормативтік актілер талқыланып, қолданысқа енгізіледі. Халықаралық, республикалық жарыстарда топ жарған шебер ұстаздар да өз білім-білігін бөлісетін болады.
Ақмарал Бақытқызының айтуынша, биыл облыс бойынша 35500 оқушы алғаш рет мектеп табалдырығын аттайды. Сонымен қатар «Келешек мектептері» жобасы аясында аймақта 26 мектептің құрылысы жүргізіліп жатыр. Осы бағытта былтыр 9 мектеп пайдалануға берілсе, биылғы оқу жылында 17 мектеп оқушыларға есігін айқара ашады. Жалпы облыста 362 мыңнан астам оқушы білім алып жатыр десек, 2024-2025 оқу жылын 17790 оқушы аяқтаған. 1400 оқушы «Алтын белгі» иегері атанып, 7500 мыңнан астамы мемлекетік грантты жеңіп алған. Олардың ішінде талғарлық бір түлек ең жоғарғы 140 балл жинағанын жұртшылық жақсы біледі.
1-ден 24-сессияға дейінгі отырыстар Қаскелеңдегі жайлы мектепте өтті. Іле ауданы №51 орта мектебінің мұғалімі Айшолпан Адаева «Білімдегі жаһандық құндылықтар: мектеп тәжірибесі мен қазіргі тәсілдер» тақырыбында баяндама жасады. Еңбекшіқазақ ауданы О.Жандосов атындағы мектеп директоры Айжан Жәмешева «Жаһандық құзыреттерді оқытудың ерекшеліктері» тақырыбын ашып көрсетті. Ал Қонаев қаласы Ш.Уәлиханов атындағы №2 мектептің мұғалімі Ольга Затеева «Жаһандық құзыреттілік қалыптастырудағы білімнің рөлі» тақырыбында шеберлік сабағын өткізді.
Басқа панельдік сессияларда инклюзивті білім беру мен ерекше балаларға психологиялық-педагогикалық қолдау көрсету мәселелері қаралды. Бұл бағытта дефектологтар, логопедтер мен психологтардың рөлі ерекше атап өтілді. Сонымен қатар «Ауыл мектебі – сапа алаңы» және «943 елдің мақсатты мектептері» жобаларын іске асыру ерекшеліктері, арнайы білім беру ұйымдарының жұмысы және басқа да тақырыптар талқыланды.
Шамалған ауылындағы көпсалалы колледжде 25-тен 30-сессияға дейінгі панельдік отырыстар өтті. Облыстық білім басқармасының техникалық және кәсіптік білім беру бөлімінің басшысы Кенжегүл Дүйсентаеваның айтуынша, бұл колледж кездейсоқ таңдалмаған. Мұнда жұмысшы мамандарды дайындауға арналған зертханалар мен шеберханалар, сонымен қатар Satbayev University және жұмыс беруші компаниялармен серіктестік жақсы жолға қойылған.
Сессияға қатысушылар оқу шеберханалары мен зертханалардың жағдайымен де танысты. Олар жайлы арнайы пәндер оқытушысы, техника ғылымдарының кандидаты, профессор Жанат Қуатбеков айтып берді.
Қошмамбет ауылындағы жайлы мектепте өткен сессияларда дене шынықтыру, спорт және туризм, бастапқы әскери дайындық, технология пәні және басқа да тақырыптар қарастырылды. Бірнеше сессия қосымша білім беру мәселелеріне арналды. Сондай-ақ білім беру саласындағы ғылыми-тәжірибелік ақпараттық технологиялар орталығының жұмыс тәжірибесі зерделеніп, «STEM және кәсіби бағдар: болашақ мамандарды бастапқы даярлау», «Мектептен стартапқа дейін: STEM мен жасанды интеллектке негізделген білім беру моделі», «AR/VR технологияларын және геймификацияны информатика сабақтарында қолдану» тақырыптары кеңінен талқыланды.
Қуат ҚАЙРАНБАЕВ
Қарасай ауданы
