Райымбек ауданында өтіп жатқан әкім сайлауына аудандағы еңбек ерлері де белсене қатысуда. Солардың бірі – еліміздің еңбек майданында тер төккен механизатор Күлбара Башебаева. 1975 жылы «Құрмет белгісі» орденімен, 1980 жылы «Еңбек Қызыл Ту» орденімен марапатталған. 1981 жылы Бүкілодақтық Паша Ангелина атындағы жүлдені алған аудандағы тұңғыш әйел-механизатор, бесжылдық жоспарын төрт жылда орындаған еңбегі үшін төрт рет арнайы медальдар мен алғыс хаттарға ие болған. Сондай-ақ Қазақстан Компартиясының XV съезінің делегаты, республикалық әйелдер съезі мен кәсіподақ конференцияларына бес рет сайланып, бүкілодақтық көрменің алтын медалін еншілеген, көптеген мақтау грамоталарымен марапатталған. 2015 жылы Райымбек ауданының Құрметті азаматы атағын алған. Еңбек ардагері Қызылшекара ауылындағы №783 саулау учаскесінде өз таңдауын жасады.
– Бұрын ауданда әкім тағайындалғанын ғана еститінбіз. Ал бүгін бірінші рет әкімді өзіміз сайлағалы жатырмыз. Әр тұрғынның даусы маңызды. Бұған немқұрайлы қарауға болмайды. Ауданымыздың көркейіп, өркендеуіне, болашағының жарқын болуына әр дауыс берушінің пікірі маңызды, – деді Күлбара Башебаева.
Еңбекқорлық пен табандылықтың жаршысы болған оның белсенділігі сайлау күні ерекше әсер қалдырып, азаматтық ұстанымы жастарға үлгі болды.
