Жұмысшы мамандығы иелерінің мәртебесін көтеру, қоғамда еңбек адамының қадірін арттыру, олардың кәсіби біліктілігін шыңдау – бүгінгі күннің басты талабы. Жұмысшылардың атқарған істерін жоғары бағалау да оларға көрсетілген құрметтің бір парасы.
Балқаш ауданында егін шаруашылығының өркендеуіне өзіндік үлесін қосып жүрген жандар бар. Олар – механизаторлар. Олай дейтініміз, механизаторлар егіс алқабында атқарылатын барлық жұмыстың сапалы әрі жедел аяқталуы үшін бар күш-жігерін салып, таң атқаннан кеш батқанға дейін дала төсінде жұмыс істейді. Бүгінгі әңгіме кейіпкері де өзінің біліктілігін көрсетіп, дала төсінде жұмыс істеп жүрген азаматтың бірі – Дидар Құлсейітов. Ол Ақдала ауылдық округіне қарасты «Бауыржан-7» жауапкершілігі шектеулі серіктестігінде механизатор болып еңбек етеді.
Дидар Құлсейітов бүгінгі таңда аталмыш шаруашылықта шөп тиейтін құрылғы орнатылған «МТЗ-80» тракторын тізгіндеп, қысқы мал азығын дайындау жұмысын жүйелі атқарып жүр. Бала жасынан егіс алқабында еңбек етуге бел буған Дидардың өзінен кейінгі жастар үлгі тұтар қасиеттері жетерлік. Барлық жұмысқа төзімділікпен қараған механизатор әр көктемді сағына күтеді. Өйткені бұл кезеңдерде егіс алқабында қызу еңбек басталады. Ал жаз айлары диқандар үшін тынымсыз еңбек ететін мезгіл. Қоңыр күзде Дидар сынды механизаторлар үшін егіс алқабында атқаратын жұмыс жетерлік. Егін егумен айналысатын шаруашылықтарда механизатор болып жұмыс істеудің қыр-сырын әбден меңгерген әңгіме кейіпкері өзінің жұмысына қашанда тиянақты.
Тәуелсіз мемлекетіміздің өркендеп, экономикасын арттыру үшін жұмысшы мамандығының беделін көтеру керек. Ең алдымен мектептерде кәсіптік бағыт-бағдар беру жүйесін жетілдіріп, техникалық колледждер мен оқу орындарын жаңа технологиямен жабдықтау арқылы біз мамандардың біліктілігін арттырамыз. Сол арқылы еңбек адамын қадірлейтін, шын мәніндегі дамыған қоғам құра аламыз.
Жұмысшы мамандық иелеріне қашанда құрметпен қарағанымыз абзал. Себебі жұмысшы мамандық иелері адал еңбектің, маңдай термен тапқан нанның қадірін біледі.
Бақтығали ДӘУІТБАЕВ
Балқаш ауданы
