Ғылым саласы асқан табандылық пен үздіксіз ізденісті талап етеді. Осы қастерлі жолда аянбай тер төгіп, еліміздің білім беру саласына өзіндік үлесін қосып келе жатқан жаңашыл ғалымдардың бірі Қырмызы Жұмабекова дер едік.
Қырмызы Бақытқалиқызы 1983 жылы 8 маусымда Кеген ауданы Жылысай ауылында дүниеге келген. 1989-2000 жылдары М.Орманов атындағы орта мектепте білім алып, оны үздік аттестатпен тәмамдайды. Жастайынан өнерге де жақын болып, мектеп жанындағы өнер мектебінен домбыра сыныбын бітіріп шығады.
Ғылым мен білімге деген шексіз құштарлығының арқасында 2000-2004 жылдары Орталық Азия университетінде «Қазақ тілі мен әдебиеті» мамандығының бакалавр дәрежесін үздік дипломмен бітіріп, кейін ҚазҰУ-дың магистратурасында «Педагогика және психология» мамандығы бойынша білімін жалғастырады. Мұнда да үздік нәтиже көрсетіп, магистр дәрежесіне ие болады.
2006 жылдан Әл-Фараби атындағы Қазақ ұлттық университетінің философия және саясаттану факультетіне қарасты «Педагогика және білім беру менеджменті» кафедрасында аға оқытушы қызметін атқарып келеді. Қызмет барысында Қырмызы Жұмабекова білікті маман, шығармашыл тұлға ретінде танылды. Ғылымның шынайы жанашыры, жаңашыл ойдың иесі, болашақ педагогтердің білікті тәрбиешісі бола білді.
2018-2021 жылдары Әл-Фараби атындағы Қазақ ұлттық университетінің докторантурасын сәтті аяқтап, «Білім менеджерлерінің инновациялық басқару құзыреттіліктерін қалыптастырудың педагогикалық-психологиялық негіздері» тақырыбында докторлық диссертациясын сәтті қорғап шықты. Бұл – ғылымдағы үлкен белес, зор жауапкершілік пен терең ізденістің жемісі. Қазіргі таңда ол философия докторы (PhD) дәрежесіне ие.
Ғалымның 50-ден аса ғылыми еңбегі, оның ішінде ғылыми мақалалар, оқу құралдары, әдістемелік нұсқаулықтары бар. Бұл білім беру жүйесін жетілдіруге, болашақ педагог мамандардың кәсіби құзыреттілігін арттыруға зор үлесін қосуда. Осы жетістіктерімен қатар Қырмызы Бақытқалиқызы «Қазақстан патриоты», Әл-Фараби атындағы Қазақ ұлттық университетінің «Ерен еңбегі үшін» сияқты көптеген медаль-төсбелгілердің иегері атанған.
Білім-ғылым жолында осындай асқар биікті бағындырған Қырмызы Бақытқалиқызын философия докторы (PhD) дәрежесін иеленуімен шын жүректен құттықтаймыз! Сіздің еңбегіңіз, ғылымға қосқан үлесіңіз жас ұрпаққа үлгі, ал болашақ мамандар үшін бағыт-бағдар болмақ. Ел игілігі жолындағы еңбегіңіз еселене берсін!
Омар ҚИҚЫМОВ,
Қазақстанның еңбек сіңірген қайраткері
