Балқаш ауданының әкімі Азат Құтпанбетов Бақанастағы М.Сеңгірбаев атындағы орта мектепке барып, аталмыш білім шаңырағына жүргізіліп жатқан күрделі жөндеу жұмысымен танысты.
«Сем Шоғы Құрылыс – Сервис» жауапкершілігі шектеулі серіктестігінің директоры Серік Жазықбаев пен құрылыс мердігерінің прорабы Нұрлан Төребектен осы уақытқа дейін атқарылған жұмыстар жайын сұрап, жаңа оқу жылы басталғанша құрылысты аяқтауды тапсырды. Сонымен қатар нысанның техникалық қадағалаушысы Марат Тортаев пен Балқаш аудандық білім бөлімінің басшысы Шолпан Қошахановаға сапаға баса мән беріп, бақылауды күшейтуді жүктеді.
«Сем Шоғы Құрылыс – Сервис» ЖШС директоры Серік Жазықбаев қазіргі таңда ғимаратты әрлеу жұмыстарының 80 пайызы орындалғанын, сынып бөлмелеріне терезелер орнатылғанын, электр жүйесінің толықтай тартылғанын баяндады. Ғимараттың жылыту қазандығы табиғи газға қосылады.
Жұмыс қарқынын жеделдетіп жатқан құрыш қолды құрылысшылар білім шаңырағының күрделі жөндеу жұмысын дер кезінде бітіруге бар ынта-жігерімен жұмыла кірісіп жатқандарын айтты.
Оқушылардың сәні мен сәулеті жарасқан мектепте білім нәрімен сусындайтын күндеріне де аз уақыт қалды.
Бақтығали ДӘУІТБАЕВ
Балқаш ауданы
