Қонаев қаласының орталық алаңында 3660 әскери бөліміне Отан алдындағы әскери борышын өтеуге келген жас сарбаздардың ант қабылдау рәсімі өтті. Жауынгерлік Ту салтанатты түрде сап түзеген сарбаздардың ортасына әкелініп, Мемлекеттік Гимн орындалғаннан кейін сөз 3660 әскери бөлімінің командирі Ерлік Оспанқұловқа берілді.
– Бүгінгі күн – біздің әскери бөлім үшін ерекше күн. Қатарымызды толықтырған жас сарбаздар әскери ант қабылдайды. Әскери анттың мәні өте зор. Өздеріңе жүктелген міндетті, әскери жарғыны бұлжытпай орындауға, қызметтің қиыншылығын табандылықпен көтеруге дайын болыңдар. Тәуелсіздік пен тұтастығымызды, тыныштығымыз бен бейбіт өмірімізді күзетіп, халыққа қорған болған ұлттық әскердің айбыны арта берсін! – деді Ерлік Ерланұлы.
Көпшіліктің тағатсыздана күткен сәті де келіп жетіп, қаз-қатар сап түзеген Қарағанды, Түркістан, Жамбыл, Жетісу, Шығыс Қазақстан облыстарынан әскер қатарына алынған 200-ден астам жас сарбаз кезегімен келіп, салтанатты түрде ант қабылдады. Қазақстан Республикасының Ұлттық Ұланы «Оңтүстік» өңірлік қолбасшылығы 3660 әскери бөліміне келіп, Отан алдындағы борышты ресми түрде өтеуге кіріскен сарбаздарды құттықтаған Қонаев қаласының әкімі Асхат Бердіханов пен аталған бөлімнің ардагерлер кеңесінің төрағасы, запастағы майор Жандарбек Искахов әрбір азаматтың жүрегінде мәңгі сақталатын тарихи сәттегі ел Туының астында адал қызмет етуге, туған жердің тыныштығы мен халқымыздың амандығын қорғауға берген антына адал болуға шақырды. Сондай-ақ бұл рәсімнің ата-аналар үшін де зор мақтаныш пен қуаныш екенін, ұлдарының Отан қорғаушы ретінде азаматтық пен ерлік жолына түскенін атап өтті. Балжан Төлеметова, Ержан Аяшов, Ирина Овгарова сынды ата-аналар перзенттерінің ел қорғауға басқан қадамдарына құтты болсын айтып, ақжарма тілектерін арнады.
Ант қабылдау рәсімі жас сарбаздардың салтанатты шеруімен аяқталды.
Айжарық КӨПТІЛЕУОВ
