Қоғамдық өмірде қарттардың қарышты қадамы қызыға қарауға тұрарлық. Ойымыз негізсіз де емес. Пайғамбар жасынан асқандардың бәрі де айналасындағы, қоғамдық ортадағы тіршілік тынысына бей-жай қарай алмайды. Олардың спортта да жұдырықтай жұмылған ұйымшылдықтары қуантады.
Жылдағы қалыптасқан дәстүр бойынша әрі салауатты өмір салтын қалыптастыру бағытында Қарасай аудандық кітапхана ғимаратының «Адалдық алаңы» атты бөлмесінде шахмат пен дойбыдан кең көлемді жарыс ұйымтастырылды. Сайысқа жиырмадан астам шахматшы мен дойбышылар қатысты. Бұлар жай қатардағы ойыншылар емес, шетінен облыс көлемінде өткен небір сайыста өздерін жүзден жүйрік, мыңнан тұлпар етіп көрсеткендер. Сондықтан да аталған жарысқа жанкүйер қауым да көп жиналды. Сондай-ақ, шахмат тақтасындағы шайқасқа Шахмат федерациясы Қарасай аудандық филиалының төрешісі, әділдік тұрғысынан ұйғарым жасайтын Пак Геннадий ақсақал мен облысқа танымал ұлттық төреші Амандолла Әбдімұратов төрелік етті. Ол екеуін шахматшылар мен жанкүйер қауым бірауыздан қолдады.
Жарысқа қатысушылар алдында Қарасай аудандық ардагерлер ұйымының төрағасы Сағат Мәсімақынов сөз сөйлеп, шахматшыларды және дойбышыларды жарыс ережесімен таныстырып, жарыс туралы егжей-тегжейлі түсініктеме беріп, жарыс сайыпқырандарына жеңіс пен ойында сәттілік тіледі. Жарыс барысы ә дегеннен-ақ тартысты басталды. Тәжірибесі толысқан шахматшылар көпшілік алдында шынайы өнерлерін көрсетті. Аталған жарысқа Райымбек ауылдық округінен Құралай Әуелғазина, Әтіркүл Айманбетова сияқты ардагер әйелдердің де арнайы қатысқанын айта кеткен артық болмайды.
Жарыс қорытындысында жеңімпаздардың есімдері белгілі болды. Бірінші орынды Қаскелең қалалық округінен Амандолла Әбдімұратов, екінші орынды Ұмтыл ауылдық округінен Темірхан Бөжімов, үшінші орынды Шамалған ауылдық округінен Жәмел Насанов иеленді. Ал дойбыдан Райымбек ауылдық округінен Құралай Әуелғазина жеңімпаздар қатарынан көрінді. Бірінші орынды жеңіп алған Амандолла Әбдімұратов облыс көлемінде өтетін шахматшылар жарысына жолдама алды.
Жеңімпаздарға Қарасай аудандық ардагерлер ұйымының төрағасы Сағат Мәсімақынов аудан әкімінің Алғыс хаты мен ақшалай және заттай сыйлықтарын табыс етті. Сонымен қатар төраға жарысқа қатысушылардың аудан орталығынан алдағы уақытта «Шахматшылар клубын» ашып беру жөніндегі ұсыныс-тілегін, өтініштерін тиісті орындарға жеткізетініне сенім білдірді.
Қанат ТӘКЕБАЕВ
Қарасай ауданы
