Қонаев қаласындағы Балаларды қолдау орталығында Қарасай аудандық білім бөлімінің ұйымдастыруымен тағылымдық, шығармашылық бағыттағы шара өтті. Мақсаты – балалардың ғылымға қызығушылығын ояту, эмоционалды қолдау көрсетіп, рухани дамуына ықпал ету. Онда жеткіншектер ғылыми тәжірибелер мен шеберлік сағаттарына қатысып, гүл отырғызып, құмыра жасауды үйренді, естелік сыйлықтарды иеленді.
– Біздің мақсатымыз – балалардың көңілін көтеріп қана қоймай, танымдық шара арқылы ғылым-білімге баулу. Мұнда тәрбиеленушілер химиялық, биологиялық тәжірибелерді бақылап, робототехниканың қыр-сырын меңгерді. Шараға Қарасай ауданының әдіскерлері мен жас мамандары жұмылдырылып, барлығы 15 оқытушы келдік. Бұл біздің тәжірибемізде алғаш ұйымдастырылып тұрған шара емес. Түрлі орталықтармен тәжірибе алмасып, балалармен жұмыс істейміз. Себебі кез келген баланың тағдыры – біз үшін үлкен жауапкершілік. Мұндай шаралар жасөспірімдердің мамандық таңдауына, өмір жолын анықтауына септігін тигізеді. Қазір балалар демалыста болғандықтан, тек ұстаздар келді. Оқу жылы басталғанда, оқушылар да осы жобаға атсалысатын болады. Алдағы уақытта әскери-патриоттық, ғылыми, шығармашылық, спорт бағытындағы түрлі шаралар жалғасын табады, – деді Қарасай аудандық білім бөлімінің басшысы Әсел Еркімбаева.
Ғылыми тәжірибеге қатысқандардың бірі – Балаларды қолдау орталығының тәрбиеленушісі Алтынай Бекеева. «Биыл 9-сыныпқа аяқ бастым. Мектепте оқытылатын пәндерден химия пәні ерекше ұнайды. Болашақта химия мен биология пәндерін таңдау пәні ретінде алып, осы бағыт бойынша оқуға түскім келеді. Ғылыми тәжірибе жасау барысында теориялық білімімді практикамен ұштастырдым», – деді ол.
Шарада Алматы облысының қызмет көрсету және тамақтандыру саласындағы инновациялық технологиялар колледжінің түлектері аспаздық сабағын өткізді. Колледж түлегі Руслан Тоқтасынов – осы салада он жылдан астам тәжірибесі бар аспаз. Ол балалардың үйреткен техникаларды тез меңгергенін және қызығушылығы жоғары екенін жеткізді.
Осылайша Балаларды қолдау орталығының тәрбиеленушілері тағылымды шарада таным көкжиегін кеңейтті.
Гүлзат БАЙҚОНЫСОВА
