ҚР ҰҚК Шекара қызметі Алматы облысы бойынша департаментінің шекарашылары Кеген аудандық полиция қызметкерлерімен бірлесіп, 18 миллионға жуық теңгеге бағаланған мал ұрлығының алдын алды.
Алдын ала келіп түскен ақпаратқа сәйкес, Қазақстан мен Қырғызстан шекарасының бойында жалпы саны 31 жылқы қолды болған. Осы қылмысқа қатысы бар 42 және 22 жастағы екі күдікті ұсталып, Кеген аудандық полиция бөлімінің уақытша ұстау изоляторына қамалды.
Шекара бойында өз бетінше жайылып жүрген жылқыларды қолды қылып, оңай пайда таппақ болған күдіктілерге қатысты алдын ала тергеу жұмыстары басталды. Сондай-ақ олардың осыған ұқсас қылмыстарға қатыстылығы тексерілуде.
«Ұқыпсыздың малы – ұрының наны» демекші, мал ұрлығы малшылар тарапынан тиісті бақылаудың болмауынан орын алады. Қараусыз жайылған малының жоғалғанын кеш байқаған адамдар полицейлерге уақыт өткізіп барып, хабар беруі де қылмыстың дер кезінде ашылмауына себепші болып отыр. Өз бетінше іздеп, табанынан таусылып жүргенде мал мен ұрыны іздестіруді жеңілдететін айғақтар мен іздер жоғалып кететіні де бар.
Айту керек, шекарашылар жергілікті тұрғындардың шекараға жақын маңда өз бетінше жайылып жүрген малының қауіпсіздігіне жауап бермейді. Өйткені жел өтіндегі әскерилерге Тәуелсіз Қазақстанның шебін көздің қарашығындай күзету жүктелген. Соған қарамастан, шекарашылар ауыл тұрғындарына қора мен өрістегі малына жауапкершілікпен қарап, сақтық шараларын күшейтуге шақырады.
Шекарашылар берген ақпаратқа сәйкес қимылдаған жергілікті полиция қызметкерлерінің жедел-профилактикалық шарасының нәтижесінде, барымташылар құрықталып, темір торға қамалды.
Тамара Дәулетбаева
Кеген ауданы
