Облыстық әкімдіктің мәжіліс залында мәслихаттың кезекті XL сессиясы өтті. Жиынға облыс әкімінің орынбасары Бақытнұр Бақытұлы мен облыстық басқарма басшылары, депутаттар қатысты. Сессияның күн тәртібінде өңір халқы үшін маңызды үш мәселе қаралды. Ауылда денсаулық сақтауды жаңғырту жобасының жүзеге асырылуы, елдімекендерді абаттандыру қағидаларына енгізілетін өзгерістер және өрт сөндіруде пайдаланылған ауызсу шығындарын өтеу тәртібі талқыланды.
Жиынды ашып, жүргізіп отырған облыстық мәслихат төрағасы Қуат Байғожаев қозғалатын әр мәселенің айрықша маңызды екенін тарқатып, ел алдында еңселі жұмыс атқарылуы тиіс екенін сөзіне қосты.
Күн тәртібіндегі алғашқы мәселе – «Ауылда денсаулық сақтауды жаңғырту» пилоттық жобасын іске асыру барысы туралы облыстық денсаулық сақтау басқармасы басшысының орынбасары Ләйлә Пернебайқызы баяндама жасады. Басқарма өкілінің айтуынша, 2024-2025 жылдары облыс бойынша ауыл халқына қолжетімді медициналық көмек көрсету мақсатында 38 денсаулық сақтау нысанының құрылысы жоспарланған. Оның ішінде 15 дәрігерлік амбулатория, 12 фельдшерлік-акушерлік пункт және 11 медициналық пункт бар. Осы орайда Ләйлә Пернебайқызы құрылыс жұмыстары Балқаш, Ұйғыр, Жамбыл, Кеген, Іле және Қарасай аудандарында жүріп жатқанын тілге тиек етіп, жобаға жалпы 8,2 млрд теңге қажет болса, 2024 жылы 3,3 млрд теңге игерілгенін, ал 2025 жылға 4,9 млрд теңге бөлінгенін айтып өтті. Ол өз сөзінде:
– Қазіргі уақытта 19 нысанның құрылысы аяқталып, пайдалануға берілген. Мәселен, Жамбыл ауданының Айдарлы ауылында дәрігерлік амбулатория, Саурық батыр ауылында фельдшерлік пункт ашылды. Балқаш ауданының Миялы ауылында да жаңа медициналық нысан пайдалануға берілді. Қалған 19 нысандағы жұмыстар 45-85 пайыз аралығында орындалған. Құрылыс-монтаж жұмыстарының толық аяқталуы қыркүйек-қазан айларына жоспарланып отыр. Алайда 6 нысанда қаржыландыру тапшылығына байланысты жұмыстар уақытша тоқтап тұр. Осыған орай қосымша 1,1 млрд теңге бөлінген, – деп жаңа нысандардың іске қосылуы ауылдықтар үшін медициналық көмектің қолжетімділігін арттырып, алғашқы медициналық-санитарлық қызметтің сапасын жақсартатынын жеткізді.
Келесі кезекте облыстық мәслихаттың 2024 жылғы 21 шілдедегі №22-112 «Алматы облысы қалалары мен елдімекендері аумағын абаттандыру ережелерін бекіту туралы» шешіміне өзгерістер мен толықтырулар енгізу туралы облыстық тұрғын үй-коммуналдық шаруашылық және абаттандыру басқармасының бөлім басшысы Бауыржан Осман өз баяндамасын ортаға салып, елдімекендердің аумақтарын абаттандыру қағидаларына енгізілетін өзгерістерді таныстырды. 2024 жылы қабылданған қағидалар аумақты күтіп-ұстау, санитариялық тазалық пен инфрақұрылымды қорғауды реттесе, енді жаңа толықтырулар арқылы меншік иелерінің жауапкершілігі күшейтілмек. Осы орайда басқарма өкілі өз сөзінде:
– Жаңа өзгерістерге сәйкес жеке және заңды тұлғалар өздеріне тиесілі нысандардың айналасын таза ұстауға міндеттеледі. Қоқыс жағуға, көлік жууға, кілем қағуға көпқабатты үйлердің аулаларында, демалыс аймақтарында тыйым салынады. Тротуарлар мен көгалдарға көлік қоюға жол берілмейді. Шлагбаум, қоршаулар секілді кедергілер арнайы техниканың өтуіне бөгет жасамауы тиіс. Қоқысты белгіленбеген орындарға төгуге де қатаң тыйым салынады. Сонымен қатар, «Абаттандыру паспорты» енгізіледі. Бұл құжат нақты аумаққа күтім жасаудың талаптары мен параметрлерін айқындап, жауапты тұлғаны көрсетеді. Осылайша, жергілікті атқарушы органдар мен коммуналдық қызметтердің жұмысы ашық әрі тиімді болмақ, – деп аталған өзгерістер экологиялық жағдайды жақсартуға, заңбұзушылықты азайтуға және халықтың тұрмыс сапасын арттыруға ықпал ететінін айтты.
Күн тәртібіндегі үшінші мәселе – ауызсуды өрт сөндіруге пайдалану кезінде сумен қамту және су бұру жөніндегі ұйымдарға шығындарды өтеуге жергілікті атқарушы органдардың шығыстарын бекіту туралы облыстық энергетика және сумен жабдықтау басқармасы басшысының орынбасары Рақыш Әбдірахымұлы тарқатып өтті. Жаңа шешім жобасы 2025 жылғы Су кодексінің талаптарына сәйкес әзірленген. Енді жергілікті бюджет өрт сөндіруде пайдаланылған су үшін сумен қамту ұйымдарының шығынын өтейді. Осы орайда басқарма өкілі:
– Есеп жүргізу облыстық ТЖД-нің ресми хабарламалары негізінде жүзеге асырылады. Яғни, қай жерде, қанша уақыт бойы, қандай нысанда өрт болғаны және қанша су пайдаланылғаны нақты көрсетіледі.
Осы мәліметке сүйене отырып, уәкілетті орган қолданыстағы тариф бойынша есеп шығарып, шығынды өтейді, – деп аталған шешім сумен қамту ұйымдарының қаржылық тұрақтылығын реттеп, коммуналдық инфрақұрылымның үзіліссіз жұмыс істеуіне жағдай жасайтынын жеткізді.
Күн тәртібіндегі соңғы мәселе – өңірлік жағдайлардың ерекшеліктерін ескере отырып, жалпы су пайдалану қағидаларын бекіту туралы облыстық су ресурстары және ирригация басқармасының басшысы Саят Маратұлы айтып өтті. Мәслихат төрағасы Қуат Сұлтанұлы бұл мәселе бойынша әділет органдарына қажетті келісім алынбаған жағдайда шешім тіркеуден өткізілмейтінін және заңды күшіне енбей қалатынын ескертті. Сондықтан да дұрыс әрі уақытылы шешілуі үшін әділет органдарынан келісім алу жұмыстарын жеделдетуді сұрады.
Облыстық мәслихаттың кезекті XІ сессиясы өңір үшін өзекті мәселелерді талқылаумен ерекшеленді. Сессия жұмысын қорытындылаған облыс әкімінің орынбасары Бақытнұр Бақытұлы ауылдық медицинаны жаңғырту – халық денсаулығын жақсартуға бағытталған маңызды қадам екенін айтып, абаттандыру қағидаларына енгізілетін өзгерістер елдімекендердің санитариялық және экологиялық жағдайын көтеруге мүмкіндік беретінін сөзіне қосты. Ал өрт сөндіру кезінде пайдаланылған ауызсу шығындарын өтеу мәселесі коммуналдық кәсіпорындардың мүддесін қорғап, төтенше жағдайларда атқарылатын жұмыстың тиімділігін арттыратынын жеткізді. Су тақырыбы республика бойынша өте күрделі мәселе екендігін сөзіне қосып, қолдау тапқанына өз ризашылығын жеткізді. Осылайша, сессияда қабылданған шешімдер аймақ халқының әлеуметтік жағдайын жақсартып, өңірдің тұрақты дамуына серпін бермек.
Құралбек СӘБИТОВ
Қонаев қаласы
