Алматы облысының Шелек ауылындағы №1 аудандық ауруханаға бес жастағы қыз бала шұғыл түрде өте ауыр диагнозбен жеткізілді. Дәрігерлер науқастан жедел гангренозды-перфоративті аппендицит, жамбас абсцесі, тифлит, жамбастың іріңді перитониті, сепсис және бактериялық-токсикалық шокты анықтаған.
Анасының айтуынша, ауруханаға дейін отбасы жеті күн бойы өздігінен ем жүргізген, бұл ауыр асқынуларға және баланың өміріне қауіп төнуіне алып келген.
Науқас дереу тексеріліп, дереу ота жасалды. Лапаротомия, аппендэктомия, жамбас қуысын санациялау және дренаж орнату отасын хирургия бөлімінің меңгерушісі Еракин Қожабеков, дәрігерлер Исмаил Абдуллаев және Жандос Өтемісовтен құралған хирургтер тобы сәтті жасады.
Отадан кейін науқасты аурухана директорының міндетін атқарушы Алмас Құдайбергенов қарап шықты. Кейін бала хирургия бөлімшесіне ауыстырылды. Қазіргі уақытта баланың жағдайы тұрақты деп бағалануда. Медицина қызметкерлері қарқынды терапия мен бақылау жұмыстарын жалғастыруда.
Аурухана ұжымының кәсібилігі мен үйлесімді жұмысының арқасында аса ауыр жағдайда түскен баланың өмірін сақтап қалу мүмкін болды.
Аурухана басшылығы ата-аналарға балаларда болатын жедел ауырсыну жағдайында өздігінен ем қолданудың қауіпті екенін тағы бір мәрте ескертеді. Мамандандырылған медициналық көмекке жүгінуді кешіктіру өмірге қауіп төндіруі мүмкін.
ӘМСҚ Алматы облыстық филиалы
