Қонаев қаласының орталық алаңында әскери құрылымдарды сарбаздармен толықтырып, Отан алдындағы патриоттық сезімін күшейту мақсатында әскер қатарына шақырылған жастарды салтанатты шығарып салу рәсімі өтті. Облыстың барлық ауданынан жиналған 50 азамат ҚР Ұлттық қауіпсіздік комитетінің Шекара қызметінде өз борышын өтемек. Салтанатты жиынға ҚР Қарулы Күштерінің, шекара қызметінің ардагерлері, әскерге шақырушылардың ата-аналары да қатысты.
Шарада облыстық қорғаныс істері жөніндегі департамент бастығы, полковник Нұрбол Жұмашхан жас сарбаздарға сәттілік тіледі.
– Әскери қызмет – тәртіп пен төзімділікке үйрететін абыройлы борыш. Мемлекеттің басты байлығы – бейбіт өмір мен ел бірлігі. Сол құндылықты қорғау, ел қауіпсіздігін күзету ата-баба аманатына адалдықтың айғағы болмақ, – деді ол.
Келесі болып сөз кезегін алған Қонаев қаласы әкімі аппаратының бөлім басшысы Мәулен Майсабеков: «Қазақ халқы қашанда елін қорғаған ерлерді ардақ тұтқан. Бабаларымыз ер елінің қорғаны деп білген. Бүгінгі жас сарбаздар – сол бабалар аманатының жалғасы. Жастардың әскер қатарына аттануы – тек отбасы үшін ғана емес, бүкіл халық үшін үлкен мақтаныш, – дей келе оларға үлкен сенім артылғанын жеткізді.
Салтанатты рәсімде құттықтау сөз сөйлеген ардагерлер әскери қызметтің қиындықтары көп екенін, бірақ ер азаматқа нағыз өмірлік мектеп болатынын баса айтып, тәртіп бұзбай, қылмысқа жол бермей, абыройлы қызмет етуге тілек білдірді. Әскерге аттанғандардың ата-аналары да жас сарбаздарға ақжол тілеп, бұл қызметтің мән-маңызы жайлы сөз қозғады.
Әскери борышын өтеуге ниет білдірген Абзал Баймұхамет әскерге бару әрбір азаматтың Отан алдындағы парызы екенін атап өтіп, құрдастарын бұл міндеттен жалтармауға шақырды.
Гүлзат БАЙҚОНЫСОВА
Қонаев қаласы
