Қаскелең қаласындағы Отбасын қолдау орталығында облыстық адвокаттар алқасы мен Жеке сот орындаушылары палатасының өкілдері азаматтарды қабылдады. Онда тұрғындарды сот шешімдерінің орындалуына қатысты мәселелер алаңдатыны белгілі болды.
Қабылдау барысында ең алдымен алимент өндіруге байланысты сұрақтар көтерілді. Бұл ретте заң саласының өкілдері сот актілерін орындауда бірқатар қиындықтың кездесетінін алға тартты.
– Сот шешімі шыққанымен, борышкердің ресми табысы не өндірілетін мүлкі болмаса, оны орындау өте қиын. Сондықтан қолданыстағы мәжбүрлеп өндіру шаралары көбіне тиімсіз болып жатады, – деп түсіндірді облыстық Жеке сот орындаушылары палатасының өкілі Шағдат Еркін.
Ол сондай-ақ азаматтарға алименттен несие қарызы ұсталып қалмауы үшін арнайы шот ашу қажеттігі туралы кеңес берді. Бұдан бөлек, егер қарызгер ресми жұмыс істейтін болса, бірақ есепшоты бұғатталған жағдайда, жеке сот орындаушысына жүгініп, есепшоттардағы бұғатты алып тастауға болатынын айтты.
Облыстық адвокаттар алқасының өкілдері Олжас Омаров пен Мархабат Атайбеков азаматтар өз құқығының нақты қорғалатынын сезінуі керектігін, мұндай кездесулер тек кеңес беріп қана қоймай, кейбір мәселелерді талқылап, өзгертуге де мүмкіндік ашатынын жеткізді.
Отбасын қолдау орталығының директоры Елена Константинова әлеуметтік жағынан осал топтарға қолдау көрсеткені үшін адвокаттар мен жеке сот орындаушыларына алғысын білдірді. Мұндай іс-шаралар азаматтардың құқықтық сауаттылығын арттыруға, сот жүйесіне деген сенімді нығайтуға ықпал ететінін де атап өтті.
Қуат Қайранбаев
Қарасай ауданы
