Бүгінде мектеп оқушыларының қимыл-қозғалысының аздығы байқалады. Сондықтан олардың білім деңгейімен қатар денсаулығына да көңіл бөлу маңызды. Дүниежүзілік денсаулық сақтау ұйымының мәліметіне сүйенсек, балалар мен жасөспірімдердің 80 пайыздан астамы жеткілікті деңгейде дене белсенділігімен айналыспайды екен.
Осы орайда ҚР Оқу-ағарту министрлігінің жаңа оқу жылында бекітілген дене шынықтыру жаттығуларының тұжырымдамасына сәйкес, 9 қыркүйектен бастап облыс көлеміндегі 442 жалпы білім беру мекемесінде әр аптаның сейсенбі күні таңертеңгілік дене шынықтыру жаттығулары енгізілді. Мақсаты – оқушылардың физикалық және психологиялық денсаулығын нығайту, оқу процесіне деген ынтасын арттыру және күнді белсенді әрі сергек бастауға жағдай жасау.
Қонаев қалалық орта мектеп-гимназиясында алғашқы мәрте өткізілген салауатты өмір салтын насихаттауға бағытталған ерекше шараның куәсі болдық. Мектеп директоры Гүлзат Ержанова Оқу-ағарту министрлігінің бұл бастамасының маңызына тоқтала келе, әр аптаның сейсенбі күні өтетін таңғы жаттығуға барлық оқушылар қатысатынын айтты. Жаттығуды бірінші сабақты беретін пән мұғалімдері өткізді.
– Оқу күні барысында тұрақты түрде дене шынықтыру жаттығуын жасау білім алушылардың физикалық және эмоциялық жағдайын оңтайлы деңгейде ұстап тұруға ықпал етеді. Қан айналымын жақсартады, шаршауды азайтады, зейінді арттырып, оқу мотивациясын күшейтеді. Бұл тек денсаулықты нығайтуға ғана емес, мектепте сергектік, жігер және жағымды көңіл-күй атмосферасын қалыптастыруға көмектеседі. Жаттығу жас ерекшеліктеріне сәйкес бекітілген бейнематериалдар мен музыкалық сүйемелдеумен өткізіледі. Аталған тәжірибені енгізу өскелең ұрпақтың денсаулығын нығайтуда және салауатты өмір салты мәдениетін қалыптастыруда маңызды қадам болмақ, – деді облыстық білім басқармасына қарасты дене тәрбиесі, спорт, алғашқы әскери дайындық және қосымша білім берудің ғылыми-тәжірибелік орталығының директоры Қайрат Берікболов.
Іле ауданы Ж. Түймебаев ауылындағы №3 орта мектептегі таңғы сергіту жаттығуы джиу-джитсу және грэпплингтен әлемнің 11, Азияның 7 дүркін чемпионы, «Дарын» мемлекеттік жастар сыйлығының лауреаты, самбодан әлем чемпионатының қола жүлдегері Жібек Құлымбетовамен бірлесіп өткізілді. Оқушылар чемпионмен бірге жаттығу жасау арқылы спортқа деген қызығушылығын арттыра түскері анық.
Айжарық КӨПТІЛЕУОВ
