Талғар ауданы №2 балалар-жасөспірімдер спорт мектебі базасында ұлттық жекпе-жектен жарыстар өтті. Елдің әр өңірінен келген ауыл балуандары 53, 57, 61, 66, 71, 77, 84, 93 және +93 кг салмақ дәрежелерінде бақ сынасты.
Бұл додада тек физикалық дайындық емес, сонымен қатар тактикалық ойлау, сабыр мен рухани тәрбие сынға түсті. Ұлттық жекпе-жектің «Ақ бидай» бағдарламасына енуі – бұл дәстүрлі күрес өнерінің ел ішінде қайта жанданып келе жатқанын айғақтайды.
Алматы облысының спортшылары жоғары шеберлік танытып, жалпыкомандалық есепте 2 орын иеленді. Олар тек Түркістан облысының командасына жол берді.
Жекпе-жек нәтижелері:
Ерсін Нұрдын – 93 кг салмақ дәрежесінің жеңімпазы
Мұрат Аян – 57 кг, күміс жүлде
Санат Мұқанбек – 53 кг
Тайти Нұрлан – 77 кг
«Жекпе-жек – тек спорт емес, ол – бабалардан жеткен асыл мұра. Бұл жерде қарсыласты жеңіп қана қоймай, тәртіп пен дәстүрге құрмет те сыналады. Бүгінгі жеңіс оңайлықпен келген жоқ. Қарсыластар мықты болды. Ауыл жастарының спорттық әлеуеті зор екенін осы жарыс дәлелдеді», – деді жеңімпаз Ерсін Нұрдын.
Алты күндік жарыс нәтижесі бойынша:
1 орын – Түркістан облысы
2 орын – Алматы облысы
3 орын – Жамбыл облысы
Алда әлі де тартысты жарыстар мен жарқын жеңістер күтіп тұр!
