Қонаев қаласы мен Арна ауылының жұртшылығына жақсы таныс бір есім бар. Ол – Қуаныш Патшабай. Жетісу облысына қарасты Кербұлақ ауданының Қарашоқы ауылында туып-өскен ол бүгінде жеке кәсіпкер ғана емес, мұқтаж жандардың шынайы қамқоршысы. Ел игілігі үшін аянбай еңбек етіп жүрген азамат ретінде ол жұртшылықтың шексіз алғысына бөленіп отыр.
Қуаныш Әбілмәжінұлы жыл сайын республикалық «Мектепке жол» акциясына белсене қатысып, облыс орталығындағы мұқтаж отбасыларды, сонымен қатар Қонаевқа жақын орналасқан ауылдардың әлеуметтік жағынан аз қамтылған балаларын мектепке дайындауға көмек көрсетеді. Оқушыларға оқу құралдарын, мектеп формасын, спорт киімдерін алып беріп, балалардың қуанышы мен сенімін арттырып, олардың сапалы білім алуына жол ашады. Мәселен, Арна ауылындағы №11 орта мектеп директоры Айбар Тұрарұлы ұжым атынан кәсіпкерге ризашылығын білдіріп: «Сіздің демеушілігіңіз тек материалдық көмек қана емес, бізге үлкен жігер береді. Осындай игі бастамалар әр баланың болашағына бағытталған шынайы қамқорлықтың көрінісі», – деп жүрекжарды лебізін жеткізіп, Алғыс хат табыс етті.
Халқымыздың «Ерім дейтін ел болмаса, елім дейтін ер қайдан шықсын?» деген дана сөзі бар. Бүгінде осы сөздің нақты үлгісін Қуаныш Әбілмәжінұлының еңбегінен көруге болады. Ол – тек демеуші ғана емес, ұрпаққа үлгі, елінің адал ұлы. Өзі де көпбалалы әке. Мұндай азаматтардың арқасында «Мектепке жол» акциясы жыл сайын көптеген оқушының жаңа оқу жылын көтеріңкі көңіл-күймен бастауына мүмкіндік беріп келеді. Бұл – ел болашағы саналатын жас буынға жасалған ең үлкен инвестиция.
Осындай қайырымды жандардың қамқорлығы болашаққа деген сенімді күшейтеді. Өскелең ұрпақтың жанарына қуаныш ұялатып, білім жолындағы талпынысын арттыру – тек бір отбасының емес, бүтін бір ұлттың болашағына қосылған үлес. Қуаныш Әбілмәжінұлының ерен еңбегі мен елге деген шексіз махаббаты – адамдық пен азаматтықтың биік үлгісі. Мұндай азаматтары бар ел ешқашан еңсесін түсірмейтіні анық. Қуаныштай елжанды ерлеріміз аман болсын, қайырлы істері көбейе берсін!
Айна МҰҚАНОВА
