Қонаев қаласының, сонымен қатар Арна ауылының жұртшылығына жақсы таныс есім – Патшабай Қуаныш Әбілмәжінұлы. Жетісу облысы, Кербұлақ ауданы, Қарашоқы ауылының тумасы бүгінде жеке кәсіпкер ғана емес, мұқтаж жандардың шынайы жанашыры. Ел игілігі үшін аянбай еңбек етіп жүрген азамат ретінде ол жұртшылықтың шексіз алғысына бөленіп отыр.
Патшабай Қуаныш жыл сайын республикалық «Мектепке жол» акциясына белсене қатысып, облыс орталығының, сонымен қатар жақын орналасқан ауылдардың бірқатар баласын мектепке жинауға көмектеседі. Оқушыларға оқу құралдарын, мектеп формасын, спорт киімдерін алып беріп, балалардың қуанышы мен сенімін арттырып, олардың сапалы білім алуына жол ашуда.
Арна ауылының №2 орта мектебінің директоры Айбар Тұрарұлы Билибаев ұжым атынан ризашылығын білдіріп:
-Сіздің демеушілігіңіз тек материалдық көмек емес, бізге үлкен жігер береді. Осындай игі бастамалар әр баланың болашағына бағытталған шынайы қамқорлықтың көрінісі, – деп жүрекжарды лебізін жеткізіп, Алғыс хат табыс етті.
Халқымыздың «Ерім дейтін ел болмаса, елім дейтін ер болмайды» деген дана сөзі бар. Бүгінде осы сөздің нақты үлгісін Патшабай Қуаныш Әбілмәжінұлының еңбегінен көруге болады. Ол – тек демеуші ғана емес, ұрпаққа үлгі, елінің адал ұлы. Өзі де көпбалалы әке.
Мұндай азаматтардың арқасында «Мектепке жол» акциясы жыл сайын көптеген оқушының жаңа оқу жылын көтеріңкі көңіл-күймен бастауына мүмкіндік беріп келеді. Бұл – ел болашағы саналатын жас буынға жасалған ең үлкен инвестиция.
Осындай қайырымды жандардың қамқорлығы – болашаққа деген сенімді күшейтеді. Өскелең ұрпақтың жанарына қуаныш ұялатып, білім жолындағы талпынысын арттыру – тек бір отбасының емес, бүтін бір ұлттың болашағына қосылған үлес.
Патшабай Қуаныш Әбілмәжінұлының ерен еңбегі мен елге деген шексіз махаббаты – адамдық пен азаматтықтың биік үлгісі. Мұндай азаматтары бар ел ешқашан еңсесін түсірмейтіні анық. Патшабай Қуаныштай елжанды ерлеріміз аман болсын, қайырлы істері көбейе берсін!
Айна Мұқанова
