Облыс орталығында футболдан спорт ардагері, меценат Әділжан Қабыловты еске алуға арналған турнир өтті. Ол ұзақ жыл бойы футбол ардагерлерін қолдап, өңір спортының дамуына өз үлесін қосқан еді.
Аталған жарысқа футбол ардагерлері, әуесқой командалар және спорт саласының өкілдері қатысты. Әділжан Қабыловтың туыстары марқұмның есімін ұмытпай, турнирді ұйымдастыру бастамасын қолдаған барлық қатысушы мен жанашыр жандарға алғыс білдірді.
Турнирдің басты мақсаты – жеңімпаз команданы анықтаумен қатар спорт ардагерлерін қолдаудың маңызын насихаттау, меценаттықтың спорттағы орны мен дәстүр сабақтастығын жалғастыру.
«Әділжан Қабыловтың жанашырлығы көптеген спортшының өмірінде із қалдырды. Біз бүгін тек футбол ойнап жатқан жоқпыз, естелік пен игі дәстүрді сақтап отырмыз. Мұндай турнир ұрпақтар арасындағы байланысты нығайтып, ардагерлердің белсенді өмір салтын жалғастыруына жол ашады», – деді футболдан облыстық мамандандырылған балалар мен жасөспірімдер спорт мектебі директорының орынбасары Ернар Нұрланов.
Облыстық спортты дамыту дирекциясының футбол стадионындағы жарыс тартысты өтіп, жанкүйерлердің делебесін қоздырды. Әдемі голдар мен шешуші пенальтилер көп болды.
Финалдық кездесуде «Қарғалы» футбол клубы Іле ауданының «Медеу» командасынан басым түсіп, жеңіске жетті. Қола жүлдені Қонаев қаласының спортшылары иеленді.
Өз тілшіміз
Қонаев қаласы
