Болгарияның Албена қаласында параармрестлингтен өткен әлем чемпионатында Қарасай ауданының спортшылары үш алтын мен төрт күміс медаль иеленіп, ел абыройын асқақтатты.
«Жігер-М» мүмкіндігі шектеулі спортшылар федерациясының жетекшісі Тәжіғали Хожамұратовтың айтуынша, аталған чемпионатқа 30 мемлекеттен спортшылар қатысқан. Жалпыкомандалық есепте бірінші орынды Украина командасы жеңіп алса, Қазақстан екінші орыннан көрінді. Жарысқа Алматы облысынан 11 спортшы қатысса, олардың жетеуі – Қарасай ауданынан.
«Азамат Нұрәлиев 85 келіден жоғары салмақ дәрежесінде үшінші мәрте әлем чемпионы атанды. Бұған дейін ол Анталия және Алматыда өткен әлем чемпионаттарында жеңіске жеткен. Ол 1988 жылы дүниеге келген. Бір кездері Қаскелеңде газ шаруашылығында жұмыс істеген. Сол жерде болған жарылыстан кейін екі аяғынан айырылып, сол қолының бірнеше саусағы да жарақаттанған. Бұл оқиғадан кейін оған бірінші топтағы мүгедектік беріледі. Дегенмен Азамат мойымады, армрестлингпен айналысып, бүгінде ел намысын әлемдік аренада қорғап жүр.
Кәмила Жанәділова да – үш дүркін әлем чемпионы. Оның салмақ дәрежесі 65 келіге дейін. Бұған дейін Алматы мен Кишинев қаласында өткен чемпионаттарда топ жарған. Кәмила 1991 жылы туған. Жол апатынан кейін сол қолынан айырылған. Қазіргі таңда Шамалған ауылындағы мектептердің бірінде қазақ тілі мен әдебиеті пәнінен сабақ береді. Бос уақытында оң қолын жаттықтырып, армрестлингпен шұғылданады.
Марал Борантаева 55 келіге дейінгі салмақ дәрежесінде әлем чемпионы атанды. Бұл – оның екінші чемпиондық титулы. Болгариядағы чемпионатта ол бірден екі медаль жеңіп алды: алтын – оң қолмен күресте, күміс – сол қолмен өткен кездесуде. Команда қоржынына күміс медаль салған спортшылар – Жұлдыз Бұхарбаева, Балғын Тергеусізова және Айдана Ермекбаева.
Өткенге көз жүгіртсем, паралимпиадалық команданы құрып, осындай жандарды ортаға тартқаныма қатты қуанамын. Бүгінде олар Қазақстанды әлемге танытып жүр. Әрқайсысына мықты рух, жарқын жеңіс пен сәттілік тілеймін. Себебі ерекше жандар үшін өмірдің өзі – үлкен жеңіс, шексіз бақыт», – дейді
Тәжіғали Әбдіжәмілұлы.
Қарасай ауданы
