Қонаев қаласында жастар арасында желкенді спорттан өткен республикалық жарыс мәресіне жетті. Бірнеше күн бойы Қапшағай су қоймасының айдыны шынайы тартыс алаңына айналды. Еліміздің әр аймағынан келген 60-тан астам спортшы желкенді қайық басқарудағы шеберліктерін сынға салды.
Ауа райының құбылмалы болғанына қарамастан, жарыс жоғары деңгейде өтті. Тартысты бәсекеде топ жарғандар арасында 15 жастағы Қонаев қаласының спортшысы Жандәулет Өмірзақ та бар. «Мен 10 жасымнан бері желкенді спортпен айналысамын. Жүлделерім көп. Бұл жолы да жеңімпаз атандым. Желкенді спорт тек қайықты басқаруға емес, өзіңді жеңуге, кез келген жағдайда шешім қабылдауға үйретеді. Жел бағыты өте күрделі болды, бірақ мен барымды салдым, командамның жеңіске жетуіне үлес қоса алғаныма қуаныштымын. Осындай үлкен турнирге қатысуға мүмкіндік бергені үшін жаттықтырушыларыма және ұйымдастырушыларға алғыс айтамын», – деді желкенді спорттан ҚР спорт шебері Жандәулет Өмірзақ.
Су үстіндегі сайыста жалпыкомандалық есеп бойынша алғашқы үштікке Алматы облысынан бөлек, Түркістан және Маңғыстау облыстарының спортшылары енді. Айта кетейік, жеңімпаздар мен жүлдегерлерге 2025 жылдың қараша айында Малайзияда өтетін халықаралық регатаға қатысу мүмкіндігі беріледі.
ӨЗ ТІЛШІМІЗ
Қонаев қаласы
