Әке тәрбиесі әлсіресе, қоғам әлсірейді. Себебі бір әкенің тәрбиесін жүз мектеп бере алмайды. Бүгінде көп отбасындағы ұрпақ тәрбиесі аналарға артылып қалғандай. Кейбір әкелер бала тәрбиесінде бойын алшақ ұстайды.
Осы олқылықтың орнын толтыру мақсатында Ұйғыр аудандық білім бөлімінің ұйымдастыруымен «Адал азамат тәрбиелеудегі әке рөлі» атты әкелер құрылтайының екінші отырысы өтті. Аталған шараға құрметті қонақ ретінде Ұйғыр ауданының әкімі Бота Елеусізова, ақын, драматург, Мемлекеттік сыйлықтың лауреаты Нұрлан Оразалин, ҚР Президенті жанындағы Ұлттық құрылтай мүшесі, Қазақстан халқы Ассамблеясының кеңес мүшесі Шаймардан Нұрымов, «Парасат» орденінің иегері, Алматы облысының Құрметті азаматы Ызғарбек Бектұрсынов қатысты. Сонымен қатар аудандағы білім ошақтарында оқитын оқушылардың әкелері де осы жиынға арнайы шақыртылды.
Шараның негізгі мақсаты – жас ұрпақтың бойына ұлттық құндылықтарды сіңіру, әкенің беделі мен белсенділігін арттыру, бала тәрбиесіндегі рөлін күшейту. Жиында ел ағалары Нұрлан Оразалин, Шаймардан Нұрымов, Ызғарбек Бектұрсынов аталы ой айтты. Ел қорғаны – ұл тәрбиесінде әкенің қамқорлығымен қатар ер-азаматқа тән мінез-құлық дарытар жігері де болуы қажеттігін тілге тиек етіп, нағыз әке ұлын өзінен оздыра тәрбиелеу керек екенін жеткізді.
Ал жас әкелер атынан сөз алған аудандық ішкі саясат бөлімінің басшысы Ақжол Ташкенов «Әкесі ақылмен тәрбие берсе, баласы елге қорған азамат болады» деген қағиданы өз ойына қазық етсе, Долайты орта мектебінің директоры Аршалим Дәулетов «Әке – отбасының тірегі, тәрбие бастауы» екенін кеңінен түсіндірді. Құрылтайда тағылымды сөздер көп айтылды.
Қазақ қашанда бала бойындағы жақсылы-жаманды қасиеттерін байқаса, ең бірінші әке мен ата тәрбиесінен көреді, тегіне тартқан дейді. «Әкесі, атасы жақсы адам болатын, көргенді бала екен» десіп, әуелі ер адам тәрбиесін ауызға алады. Өйткені әкесінің баласына қалдырған ең үлкен мұрасы – оның жақсы тәрбиесі. Сондықтан да қазақта әке мектебінен өткен бала сол мұраға қиянат жасамауға тырысқан. Міне, бүгінде сол мектептің тәрбиесі әлсіреп отыр.
Аталған құрылтай әке мен бала арасындағы рухани байланысты нығайтып, өскелең ұрпаққа өнеге боларлық мәнді басқосу болды. Болашақта дәл осындай дәстүрлі жиындар түрлі тақырыпты қаузап, жалғасын таппақ.
Анар ДҮЙСЕНБАЙҚЫЗЫ
Ұйғыр ауданы
