Таяуда Алматы облысының ақпараттық кеңістігінде көптен күткен жобаның тұсауы кесілді. Қыркүйектің соңына қарай облыстың күнделікті тыныс-тіршілігінен хабар тарататын жаңадан құрылған «Qonaev Media» телеарнасы өз жұмысын бастады. Арнаны облыс аумағында ғана емес, еліміздің барлық өңіріндегі көрермен «Alma TV» және «Otau TV» платформалары арқылы тамашалай алады. Телеарна күн сайын сағат таңғы 8-ден түнгі 12-ге дейін хабар таратады.
«Qonaev Media» Алматы облысы мен жалпы ел тұрғындарына бағытталған заманауи медиаресурс ретінде ашылып отыр. Эфирде жаңалықтар, сараптамалық талдау бағдарламалары, ток-шоулар, сұхбаттар, деректі және ойын-сауық жобалары көрсетіледі. Әсіресе әлеуметтік бастамаларға, білім мен денсаулық сақтау саласының дамуына, бизнес, мәдениет, спорт пен экология мәселелеріне ерекше назар аударылады.
Телеарна басшысы Қымбат Хангелдинаның айтуынша, «Qonaev Media»-ның іске қосылуы отандық телевизия үшін жаңа мүмкіндіктер ашады: «Біздің мақсатымыз – халыққа жақын болып, өңір мен елдің келбетін қалыптастыратын шынайы оқиғаларды көрсету. Көрермен эфирден тек ақпарат қана емес, шабыт алып, айналасында болып жатқан оқиғаларға өзін тікелей қатысушы ретінде сезінгенін қалаймыз», – деді ол.
«Qonaev Media» өкілдерінің айтуынша, арна барлық жастағы көрерменге арналған контент әзірлеп, ақпаратты жедел әрі ұғынықты жеткізуді үйлестіріп отыр. «Qonaev Media» тек телеарнамен ғана шектеліп қалмай, сайт, әлеуметтік желі сияқты заманауи платформаларда да өз контентін кеңінен таратады.
Телеарна әзірге Алматыда орналасқан, Қонаев қаласына медиаорталық ғимараты салынғанда қоныс аударады.
Алматы облысының орталығы Қонаевқа қоныс аударғаннан кейін өңірдің ақпарат кеңістігінде «Жетісу» телеарнасының бөлімі жұмыс істегенін көзіқарақты оқырман жақсы білсе керек. Ендігіде бұл қызметтің жүгін «Qonaev Media» көтермек. Жаңа телеарна ұжымына шығармашылық табыс, жұмысына сәттілік тілейміз!
Айбек БЕЙСЕБАЕВ
