Бірер апта бұрын Алматы облысы әкімдігінің қолдауымен, «Дәулет-Бекет» ЖШС басшысы Сыдық Дәулетовтің бастамасымен Іле ауданы Ақши ауылында 1000 түйеден құралған әлемдегі ең ұзын түйе керуені жүріп өтіп, қазақ мәдениетін әлемге паш еткен болатын. Бүгін шараның сәтті өтіп, Гиннес рекордтар кітабына енгенін растайтын сертификатты Гиннес рекордтар кітабының ресми өкілі Ричард Стэннинг арнайы келіп, табыстады.
– Шара жоғарғы деңгейде өтті. Көп дайындық жасалғаны бірден білінді. Керуеннің сәтті өтуіне бұған атсалысқан әрбір адамның үлесі бар. Қазақстанның табиғаты қатты ұнады. Мұнда мал шаруашылығының дамып келе жатқаны қуантады, – деген Ричард Стэннинг алдағы уақытта да Қазақстанға келгісі келетінін жеткізді.
– Гиннес рекордтар кітабына кіру оңай болған жоқ. 6 ай бойы дайындалдық. Түйе – кең далада еркін өскен төрт-түліктің бірі. Оны бір ретпен жетектеп жүргізу де оңайға соққан жоқ. Соған қарамастан, шараны сәтті өткіздік. Бүгін соның нәтижесін көріп отырмыз. Өте қуаныштымын. Бұл тек мені ғана емес Ақши ауылың, облысымызды, елімізді әлемге танытты. Түйе керуенін халық қаншама жыл көрмей, ұмыта бастаған. Жиналған қауым жақсы қабылдады. Мұндай шаралар әлі де жалғасады. Келесі жылы шұбат фестивалін өткіземіз деп жоспарлап отырмыз. Ата кәсіпті дәріптеу – келер ұрпақ үшін өнеге, ұлт болашағының жарқын болуының кепілі, – деді Сыдық Дәулетов.
Гүлзат Байқонысова
